عظمیٰ نیوز سروس
چندی گڑھ //وزیر صحت اور میڈیکل ایجوکیشن سکینہ ایتو نے راج بھون میں پنجاب کے گورنر اور چندی گڑھ یو ٹی کے ایڈمنسٹریٹر گلاب چند کٹاریہ سے ملاقات کی ۔ ملاقات کے دوران وزیر نے جموں و کشمیر کے طلباء اور کاروباری برادری کی حفاظت اور سلامتی سے متعلق متعدد امور پر تبادلہ خیال کیا ۔ وزیر نے گورنر سے درخواست کی کہ وہ جموں و کشمیر کے طلباء اور کاروباری برادری کے مابین سیکورٹی کا احساس پیدا کرنے کیلئے اقدامات اٹھائیں ۔ گورنر نے وزیر کو مکمل یقین دہانی کرائی اور کہا کہ پنجاب اور چندی گڑھ کی انتظامیہ تمام جموں و کشمیر کے رہائشیوں اور طلباء کی حفاظت کو یقینی بنائے گی ۔اس موقع پر ڈی جی پی پنجاب گوربھ یادو اور ڈی جی پی چندی گڑھ سریندر سنگھ یادو بھی موجود تھے ۔ بعد ازاں وزیر نے پہلگام حملے کے نتیجے میں جموں و کشمیر کے طلباء ، کاروباری برادری اور دیگر افراد کے امور پر تبادلہ خیال کرنے کیلئے چیف سیکریٹری پنجاب کے اے پی سنہا سے بھی ملاقات کی ۔ ایڈیشنل چیف سیکرٹری ہوم امور پنجاب آلوک شیکھر بھی بات چیت کے دوران موجود تھے ۔ ملاقات کے دوران وزیر نے چیف سیکرٹری اور اے سی ایس سے درخواست کی کہ وہ اس وقت پنجاب اور چندی گڑھ میں جموں و کشمیر کے طلباء اور کاروباری برادری کے مابین سیکورٹی کے احساس کی بحالی کیلئے اقدامات اٹھائیں ۔ چیف سیکرٹری اور اے سی ایس نے اس وقت پنجاب میں موجود تمام جموں و کشمیر کے طلباء اور کاروباری برادری کی فلاح و بہبود اور حفاظت کیلئے جے اینڈ کے حکومت کو مکمل تعاون کی یقین دہانی کرائی ۔ دورے کے دوران سکینہ ایتو نے ذاتی طور پر پنجاب میں مقیم جموں و کشمیر کے طلباء اور کاروباری پیشہ ور افراد کے ساتھ بات چیت کی ۔ اترپردیش میں زیر تعلیم طلباء اور کاروباری افراد کے مابین سلامتی کا احساس پیدا کرنے کیلئے اور ان کی حوصلہ افزائی کرنے کے مقصد کے ساتھ جموں و کشمیر کے کابینہ وزیر جاوید احمد رانا لکھنو پہنچے ۔ رانا طلباء ، تاجروں اور جموں و کشمیر کمیونٹی کے دیگر ممبروں کے ساتھ بات چیت کرنے کیلئے وی وی آئی گیسٹ ہاوس سکیٹ مہاتما گاندھی مارگ لکھنئو میں دستیاب ہوں گے ۔ رانا یو پی حکومت کے سینئر کارکنوں سے بھی ملاقات کریں گے ۔ یو پی میں زیر تعلیم جموں و کشمیر کے طلباء اور کاروباری افراد جو وزیر موصوف سے بات کرنا چاہتے ہیں یا ملنا چاہتے ہیں وہ مدسر لطیف تاسر او ایس ڈی کے فون نمبر 9419168268 اور مسٹر ریاض احمد اے پی ایس کے فون نمبر 9103792688 پررابطہ قائم کر سکتے ہیں ۔ وزیر اعلیٰ کی ہدایت کے مطابق جموں و کشمیر کے زیر تعلیم طلبا اور کاروباری افراد کے مابین سیکورٹی کا احساس پیدا کرنے کیلئے اور طلباء ، کاروباری افراد کے مسائل کو سُننے کیلئے وزیر فوڈ و سول سپلائیز اور کھیل دہرا دون پہنچے ۔ اپنے دورے کے دوران وزیر جموں و کشمیر سے تعلق رکھنے والے طلباء اور کاروباری افراد کے ساتھ بات چیت کرنے کیلئے دستیاب ہوں گے ۔ وزیر زراعت کی پیداوار جاوید احمد ڈار نے شملہ میں ہماچل پردیش کے وزیر اعلیٰ سکھوندر سنگھ سکھو سے ملاقات کی ۔ ملاقات کے دوران ہماچل پردیش میں جموں و کشمیر کے رہائشیوں کی حفاظت اور فلاح و بہبود سے متعلق اہم امور پر بھی توجہ دی گئی ۔ جاوید احمد ڈار نے وزیر اعلیٰ سے گذارش کی کہ وہ کشمیری طلباء ، تاجروں اور اس وقت ہماچل پردیش میں مقیم جموں و کشمیر کے رہائشیوں کی سلامتی اور فلاح و بہبود کو یقینی بنائیں ۔ ہماچل پردیش کے وزیر اعلیٰ نے کہا کہ ہماچل پردیش کے عوام امن پسند ہیں اور فرقہ وارانہ ہم آہنگی کی اقدار کو مضبوطی سے برقرار رکھتے ہیں ۔ انہوں نے یقین دلایا کہ ریاستی حکومت ہماچل پردیش میں مقیم جموں و کشمیر سے تعلق رکھنے والے تمام باشندوں کی حفاظت ، سلامتی اور فلاح و بہبود کی ضمانت کیلئے ہر ممکن اقدام اٹھائے گی ۔ نائب وزیر اعلیٰ سریندر کمار چودھری نے مہاراشٹرا کے نائب وزیر اعلیٰ ایکناتھ شندے سے ممبئی میں ملاقات کی اور جموں و کشمیر کے رہائشیوں کی حفاظت کو یقینی بنانے کے اقدامات پر اطمینان کا اظہار کیا ۔ نائب وزیر اعلیٰ نے سلامتی کا احساس پیدا کرنے کیلئے جموں و کشمیر کے طالب علموں ، تاجروں اور پیشہ ور افراد کے ساتھ بھی بات چیت کی ۔ سریندر چودھری نے ایکناتھ شندے سے مطالبہ کیا کہ وہ حالیہ خدشات کے پیش نظر جموں و کشمیر کے طلباء ، تاجروں اور پیشہ ور افراد کے تحفظ کیلئے ضروری اقدامات اٹھائیں ۔ اس کے جواب میں شندے نے اپنی مکمل حمایت کی یقین دہانی کرائی اور اس بات کا اعادہ کیا کہ حکومت اور مہاراشٹرا کے عوام دونوں جموں و کشمیر کے لوگوں کی حفاظت اور مدد کیلئے مضبوطی سے ان کے ساتھ کھڑے ہیں ۔ نائب وزیر اعلیٰ نے مختلف کالجوں اور یونیورسٹیوں کے طلباء ، نجی شعبے کے ملازمین اور تاجروں کے ساتھ الگ الگ ملاقاتیں کیں تا کہ ان کی فلاح و بہبود اور حفاظت کے خدشات کے بارے میں ذاتی طور پر پوچھ گچھ کی جا سکے ۔ انہوں نے سینئر پولیس عہدیداروں سے بھی ملاقات کی ۔
