عظمیٰ نیوز سروس
سرینگر//موسمیاتی مرکز سرینگر نے 5 اور 6 اکتوبر کے دوران جموں و کشمیر کے بالائی علاقوں میں موسم کی پہلی برف باری اور اس دوران دن کے درجہ حرارت میں نمایاں کمی کی پیش گوئی کی ہے۔محکمہ موسمیات کے مطابق، 4 اکتوبر تک جموں و کشمیر میں موسم عام طور پر خشک رہے گا، 4 اکتوبر کی شام یا رات تک ہلکی بارش، گرج چمک اور تیز ہوائوں کا امکان ہے۔5 سے 7 اکتوبر تک، موسم عام طور پر ابر آلود رہے گا اور کئی مقامات پر ہلکی سے درمیانے درجے کی بارش اور گرج چمک کے ساتھ بارش کے ساتھ ساتھ شمالی، وسطی اور جنوبی کشمیر، وادی چناب اور مرگن ٹاپ اور سنتھن ٹاپ جیسے اہم پہاڑی راستوں پر برف باری ہوگی۔محکمہ نے اس س مرحلے کے دوران خطرناک مقامات پر لینڈ سلائیڈنگ، مٹی کے تودے اور پتھرگرنے سے خبردار کیا ہے۔محکمہ نے کہا”5 اور 6 اکتوبر کو دن کے درجہ حرارت میں نمایاں کمی متوقع ہے” ۔کسانوں کو مشورہ دیا گیا ہے کہ وہ دھان کی کٹائی اور دیگر باغبانی فصلوں کو 4 اکتوبر کی سہ پہر تک مکمل کر لیں۔ محکمہ نے مزید کہا کہ 8 اور 10 اکتوبر کے درمیان موسم دوبارہ بہتر ہونے کی توقع ہے۔اس دوران کشمیر ڈویژن کے بیشتر حصوں میں دن کا زیادہ سے زیادہ درجہ حرارت معمول سے 3-4 ڈگری سیلسیس زیادہ اور جموں ڈویژن کے بیشتر حصوں میں معمول سے 1-2 ڈگری سیلسیس زیادہ رہے گا۔سب سے زیادہ درجہ حرارت کشمیر ڈویژن میں مظفرآباد میں 35.5 ڈگری سینٹی گریڈ اور جموں ڈویژن میں میرپور میں 36.5 ڈگری سینٹی گریڈ ریکارڈ کیا گیا۔کشمیر ڈویژن کے بیشتر حصوں میں رات کا کم از کم درجہ حرارت معمول سے 1-3 ڈگری سیلسیس زیادہ اور جموں ڈویژن کے کئی حصوں میں معمول سے 2-3 ڈگری سیلسیس زیادہ رہا۔ محکمہ موسمیات نے بتایا کہ کشمیر ڈویژن میں پہلگام میں سب سے کم درجہ حرارت 7.6 ڈگری سیلسیس اور جموں ڈویژن میں بانہال میں 11.3 ڈگری سیلسیس ریکارڈ کیا گیا۔
