یو این آئی
سرینگر//جموں وکشمیر ٹیچرز فورم نے ہفتے کو یہاں پریس کالونی میں اپنے مطالبات کو لے کر احتجاج درج کیا۔احتجاجیوں نے ہاتھوں میں بینر اٹھا رکھے تھے اور وہ جی پی فنڈ کو واگذار کرو وغیرہ جیسے نعرے لگا رہے تھے۔اس موقع پر ایک احتجاجی ملازم نے بتایا ’’ ہم اس لئے احتجاج کر رہے ہیں کیونکہ 31 مارچ سے ٹریجریوں میں جو بلیں پڑیں ہیں ان کو واگذار نہیں کیا جا رہا ہے‘‘۔انہوں نے کہا ’’ہم گذشتہ دو مہینوں سے کہہ رہے کہ ہمارا پیسہ کہاں گیا‘‘۔ان کا کہنا تھا کہ 31 مارچ سے جو ریٹائر ہوئے ان کو جی پی فنڈ، گریجوٹی وغیرہ واگذار نہیں کی جا رہی ہے جس کی وجہ سے ہم آج سڑکوں پر آنے کے لئے مجبور ہوگئے۔مذکورہ احتجاجی نے کہا ’’ہم در در کی ٹھوکریں کھاتے ہیں متعلقہ حکام کی نوٹس میں بھی یہ مسئلہ لایا لیکن کوئی سدباب نہیں کیا گیا‘‘۔انہوں نے کہا کہ حکومت کو 23 ستمبر سے 10 اکتوبر تک ایک ڈیڈ لائن دی تھی لیکن اس کے باوجود اب تک معاملہ حل نہیںہوا۔ان کا کہنا تھا کہ ہم پچھلے 4 برسوں سے سڑکوں پر نہیں آتے تھے لیکن اب ہم دوبارہ یہاں آنے پر مجبور ہوگئے۔
