سرینگر /پرویز احمد /جموں صوبے کے 10اضلاع میں کسی کی رپورٹ مثبت نہیں آئی ہے جبکہ کشمیر صوبے میں ایک شخص کو مثبت قرار دیا گیا ہے۔ متاثرین کی مجموعی تعداد 4لاکھ 54ہزار 126ہوگئی ہے۔ اس دوران جموں و کشمیر میں مسلسل 27ویں دن بھی کورونا وائرس سے کسی کی موت نہیں ہوئی ہے۔محکمہ صحت کی جانب سے فراہم کئے گئے اعداد وشمار کے مطابق جموں و کشمیر میں کورونا وائرس کی تشخیص کیلئے 19ہزار 47ٹیسٹ کئے گئے جن میں صرف ایک شخص کی رپورٹ مثبت آئی ہے۔ مثبت قرار دئے گئے ایک شخص کا تعلق کشمیر صوبے سے ہے جبکہ جموں صوبے کے 10اضلاع میں جن میںضلع جموں، ادھمپور، راجوری، ڈوڈہ ، پونچھ ، کٹھوعہ، کشتواڑ، سانبہ، رام بن اور ریاسی میں کسی کی ررپورٹ مثبت نہیں آئی ہے ۔ جموں صوبے میں متاثرین کی مجموعی تعداد 1لاکھ 66ہزار 383ہوگئی ہے۔ اس دوران جموں صوبے میں مسلسل 27ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2328بنی ہوئی ہے۔ کشمیر صوبے کے9اضلاع جن میں سرینگر، بارہمولہ، بانڈی پورہ، بڈگام، پلوامہ، اننت ناگ، گاندربل، کولگام اور شوپیان میں کسی کی رپورٹ مثبت نہیں آئی ہے جبکہ ضلع کپوارہ میں ایک شخص کو مثبت قرار دیا گیا ہے جو مقامی سطح پر رابطے میں آنے کی وجہ سے متاثر ہوا ہے۔۔ وادی میں متاثرین کی مجموعی تعداد 2لاکھ87ہزار 742ہوگئی ہے۔ اس دوران وادی میں مسلسل 70ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2423بنی ہوئی ہے۔
