سرینگر//سرکار نے ریاست کے142 غیر منقسم بلاکوں میں کھیل سرگرمیوں کو ادارہ جاتی فارمیٹ پر فروغ دینے کے لئے مصنوعی ٹرف فٹ بال فیلڈ اور کرکٹ میدان قائم کرنے کا فیصلہ کیا ہے۔یہ اعلان کھیل کود کے وزیر مولوی عمران رضا انصاری نے سرینگر میں منعقدہ ایک جائیزہ میٹنگ میں کیا۔میٹنگ میں ریاست میں کھیل کود کی سرگرمیوں اور بنیادی ڈھانچے کے فروغ کے لئے کئے گئے اقدامات پر تفصیلی تبادلہ خیال ہوا۔وزیر نے بتایا کہ مرکزی سرکار نے ریاست میں بنیادی سطح پر کھیل کود کے بنیادی ڈھانچے کے فروغ کے لئے مالی معاونت فراہم کرنے کی یقین دہانی کرائی ہے اور یہ معاونت وزیر اعظم کے ترقیاتی پیکج کے تحت منظور شدہ200 کروڑ روپے کے علاوہ ہوگی۔میٹنگ میں بتایا گیا کہ پیکج کے تحت ریاست کے تمام22 اضلاع میں کثیر المقاصد انڈور ہال تعمیر کرنے کے علاوہ بخشی سٹیڈیم سرینگراور مولانا آزاد سٹیڈیم کی تجدید کاری کا کام کیا جارہا ہے۔وزیر نے بتایا کہ ٹی آر سی میں قائم سنتھیٹک ٹرف اور غنی میموریل سٹیڈیم سرینگر میں روشنی نظام کے قیام پر2 کروڑ63 لاکھ روپے خرچ کئے جائیں گے جبکہ ریاست میں آبی کھیلوں کے فروغ کے لئے6 کروڑ روپے مختص رکھے گئے ہیں۔ریاستی سپورٹس کونسل کے سیکرٹری وحید الرحمان پرہ نے کھیلو انڈیا پروگرام کے تحت18 اپریل2017 کو داخل کئے گئے5 کروڑ63 لاکھ روپے والے ایکشن پلان کی تفصیل پیش کی۔
جموں وکشمیر میں سپورٹس سے متعلق وسیع بنیادی ڈھانچہ کی تعمیر متوقع/ عمران انصاری
