نیوز ڈیسک
سری نگر//وادی کشمیر میں درجہ حرارت مسلسل معمول سے زیادہ درج ہونے کے بیچ محکمہ موسمیات نے ہلکے سے درمیانی درجے کی بارشوں کی پیش گوئی کی ہے۔
محکمہ موسمیات نے پیر کے روز جموں و کشمیر میں منگل سے تین دن تک بارش کی پیش گوئی کی ہے، اور کسانوں سے کہا ہے کہ وہ اس مدت کے دوران زرعی کاموں کو روک دیں۔
محکمہ نے اپنی ایڈوائزری میں کہا، “مغربی ڈسٹربنس جموں و کشمیر اور اس سے ملحقہ علاقوں کو 12 اپریل (دوپہر) سے 14اپریل (دوپہر) تک متاثر کرنے کا سب سے زیادہ امکان ہے”۔
اس سسٹم کے زیر اثر، 12اپریل (رات) سے 13اپریل (دوپہر) کے دوران گرج چمک اور تیز ہواؤں کے ساتھ ہلکی سے اعتدال پسند بارش ہونے کا امکان ہے ۔ 14اپریل (پہلے دوپہر) تک وسیع مقامات پر اور اس کے بعد دیگر مقامات پر ہلکی بارش کا امکان ہے۔
دریں اثنا وادی میں شبانہ درجہ حرارت معمول سے زیادہ درج ہونے کا سلسلہ جاری ہے۔
