عظمیٰ نیوزسروس
جموں//جموں و کشمیر انتظامیہ نے 3جولائی سے شروع ہونے والے امرناتھ یاترا کے لیے جموں خطے کے مختلف قیام گاہوں میں 50,000 سے زیادہ یاتریوں کے قیام کے انتظامات کیے ہیں۔ یاتریوں کی پہلی کھیپ یاترا کے آغاز سے ایک دن قبل 2جولائی کوجموں کے بھگوتی نگر بیس کیمپ سے کشمیر کے لیے روانہ ہوگی۔ڈویژنل کمشنر رمیش کمار نے یہاں نامہ نگاروں کو بتایا کہ ’’جموں خطہ کے لکھن پور سے بانہال تک مختلف قیام گاہوں پر 50,000سے زیادہ لوگوں کے لیے قیام و طعام کی سہولیات فراہم کرنے کے انتظامات کیے گئے ہیں۔ اس مقصد کے لیے کل 106 قیام گاہیں قائم کی گئی ہیں۔انہوں نے کہا کہ یہ انتظامات پولیس ونگز کے علاوہ کٹھوعہ، سانبہ، جموں، ادھم پور اور رامبن کی ضلعی انتظامیہ نے کئے ہیں۔انہوں نے کہا کہ کٹھوعہ، سانبہ، جموں، ادھم پور اور رامبن اضلاع میں یاتریوں کو کھانا فراہم کرنے کے لیے رضاکارانہ تنظیموں کے تعاون سے کمیونٹی کچن قائم کیے گئے ہیں۔ انہوں نے کہا “ان اضلاع میں بھی تمام قیام گاہوں پر بیت الخلا کے سیٹ اپ سمیت صفائی کی سہولیات فراہم کی گئی ہیں”انہوں نے کہا کہ جموں شہر میں سماجی تنظیموں کے تعاون سے زائرین کی رہائش کے لیے بورڈنگ اور لاجنگ سنٹر بنائے گئے ہیں۔کمار نے کہا کہ یاترا 2 جولائی کو جموں سے شروع ہوگی اور لیفٹیننٹ گورنر منوج سنہا سخت حفاظتی انتظامات کے درمیان بھگوتی نگر بیس کیمپ سے اسے جھنڈی دکھا کر روانہ کریں گے۔ یاترا کا باقاعدہ آغاز 3 جولائی کو کشمیر سے ہوگا۔انہوں نے کہا کہ باقاعدہ رجسٹریشن کاؤنٹر کے علاوہ، تتکال رجسٹریشن کی سہولت بھی ہوگی، جو ماتا ویشنو دیوی مندر پر دستیاب ہوگی۔نہوں نے کہا”یہ رجسٹریشن یومیہ کوٹہ کی بنیاد پر کی جائے گی۔ اس کے لیے پانچ رجسٹریشن مراکز ہیں۔ جن یاتریوں نے اپنی رجسٹریشن مکمل کر لی ہے انہیں یاترا کے لیے آر ایف آئی ڈی کارڈ جاری کیے جائیں گے۔ یہ آر ایف آئی ڈی کارڈ لکھن پور انٹری پوائنٹ، سانبہ، جموں، چندر کوٹ اور بانہال مراکز سے حاصل کیے جاسکتے ہیں”۔یاترا کے قافلے میں تمام یاتریوں کو شامل کرنے پر، انہوں نے کہا کہ جن کے پاس اپنی گاڑیاں ہیں اور وہ یاترا سے وابستہ ہیں وہ بھی تمام ضروری رسمی کارروائیوں کو پورا کرنے کے بعد قافلے کے ساتھ جائیں گے۔ کمار نے کہا کہ جو لوگ پرائیویٹ گاڑیوں سے سفر کرنا چاہتے ہیں وہ بھی سیکورٹی کے احاطہ میں کشمیر جائیں گے۔ “ایک ایڈوائزری جاری کی گئی ہے جس میں کہا گیا ہے کہ باہر سے آنے والے انفرادی زائرین کو بھی قافلے کے ساتھ آگے بڑھنا ہوگا”۔
