نیوز ڈیسک
جموں//ایڈیشنل چیف سیکرٹری محکمہ زرعی پیداوار اَتل ڈلو نے صوبہ جموں میں ربیع فصل کے آئند ہ سیزن کے لئے محکمہ کی تیاریوں کا جائزہ لیا۔میٹنگ میں ڈائریکٹر زراعت جموں ، سکاسٹ جموں کے سائنسدانوں کے علاوہ محکمہ کے دیگر اَفسران نے شرکت کی۔ایڈیشنل چیف سیکرٹری نے بہتر پیداوار کے لئے کسانوں کو تصدیق شدہ بیج فراہم کرنے کی ضرورت پر زور دیا۔اُنہوں نے دونوں ڈائریکٹر وں پر زور دیا کہ اگر زیادہ پیداوار دینے والے بیجوں کی ضرورت ہے تو ان کی ضروریات کا صحیح اَندازہ کریں تاکہ بوائی کے وقت اس کی کوئی کمی نہ ہو۔ اُنہوں نے اَفسران سے کہا کہ وہ اِس برس بیج کی تبدیلی کی شرح کو کم سے کم 10 فیصد تک لے جائیں ۔اُنہوں نے اَفسران پر زور دیا کہ وقت پر بیجوں کی اَچھی طرح خریداری کریں تاکہ بیج بوائی سیزن سے پہلے کا شت کاروں تک پہنچ جائے۔میٹنگ میں اَتل ڈولو نے اَفسران کو ہدایت دی کہ وہ زرعی یونیورسٹیوں کے ماہرین کے ساتھ مل کر فصلوں کے زیر کاشت رقبہ کو بڑھا نے کے لئے حکمت عملی بنائیں ۔
اُنہوں نے اِس زمین کو زیر کاشت نہ رکھنے کی مختلف وجوہات کے بارے میں دریافت کیا اور اُنہوں نے محکمہ سے کہا کہ وہ اِن مسائل کو حل کرنے کے لئے اِس کے مطابق منصوبہ بندی کرے۔اُنہوں نے اَفسران سے کہا کہ وہ انہیں مختلف فصلوں کے تحت کاشت کرنے کے لئے پڑی زمین کی ضلع وار تفصیلات فراہم کریں۔ایڈیشنل چیف سیکرٹری نے اَفسران پر زور دیا کہ وہ کے سی سی سکیم کے تحت قرضوں کی تقسیم کے لئے بینکوں کے ساتھ قریبی تال میل سے کام کریں۔ اُنہوں نے اَفسران سے کہا کہ وہ تمام کسان کریڈٹ کا رڈوں کو فعال کرنے کے لئے ٹھوس کوششیں کریںاور چھوٹے کسانوں کے لئے قرضوں کو محفوظ کرنے میں ان کی مدد کریں۔اُنہوں نے ڈسٹرکٹ ایگر ی کلچر اَفسران کو ہدایت دی کہ وہ کے سی سی سکیم کے تحت بہتر کارکردگی کے لئے بینکوں کے ساتھ باقاعدگی سے کوآرڈی نیشن میٹنگ کریں۔میٹنگ کو جانکاری دی گئی کہ صوبہ جموں میں 357000.57ہیکٹر اَراضی کو مختلف فصلوں کے تحت کاشت میں لایا جائے گا جبکہ گذشتہ برس یہ رقبہ 331.90 تھا ۔ میٹنگ میں بتایا گیا کہ محکمہ کی طرف سے اِس مقصد کے لئے 58,102 کوئنٹل بیج دستیاب کئے جائیں گے۔میٹنگ میں یہ بھی جانکاری دی گئی کہ کسانوں کو سبسڈی پر 50,000کوئنٹل ایچ وائی وِی اور ہائبرڈ بیج فراہم کئے جائیں گے ۔مزید برآں ،تیل کے بیج کے تحت 20,000ہیکٹر رقبہ کی توسیع کا ہدف رکھا جائے گا۔میٹنگ میں 1.75کلوواٹ سے 2.5کلوواٹ فی گھنٹہ تک فارم پاور کے ہدف کو حاصل کرنے کے لئے فارم میکانائزیشن کے فروغ پر بھی تبادلہ خیال ہوا ۔ نیز 100 سپر سیڈر اور سٹرا ریپرس کسانوں کو تقسیم کئے جائیں گے ۔جموں وکشمیر کے اَندر اور جموں وکشمیر یوٹی کے باہر تربیت اور نمائش کے دوروں سے کسانوں کی بیداری کے لئے تقریباً70,000 کسانوں کا احاطہ کیا جائے گا۔میٹنگ میں بتایا گیا کہ زرعی سرگرمیوں کو دِکھانے اور کسانوں کو بیداری پیدا کرنے کے لئے ہر ضلع میں کسان میلے منعقد کئے جائیں گے ۔میٹنگ میں مزید اِنکشاف کیا گیا کہ کے ایم ایس 2022کے دوران 23 سیزنل آن لائن منڈیوں سے 4,500 میٹرک ٹن دھان کی خریدارری کا ہدف ہے اور رجسٹرڈ بیج کا شت کاروں سے 16,500 کوئنٹل گندم بیج بھی خریدا جائے گا جیسا کہ میٹنگ میں خلاصہ کیا گیا۔
