جموں اور سرینگر کیلئے ڈرائی پورٹس کا قیام

جموں//اپنی نوعیت کے پہلی اور بڑی پیش رفت کیتحت حکومت جموں وکشمیر نے کل شام دوبئی پورٹس ورلڈ کے ساتھ یاداشت مفاہمت پر دستخط کئے جس کے تحت ایف ڈی آئی کے ذریعے ریاست میں ملٹی ماڈل لاجسٹک پارک اور ٹرانسپورٹیشن مرکزقائم کیا جاسکے گا۔ایم او یو پر خزانہ کے وزیر ڈاکٹر حسیب اے درابو اور دوبئی پورٹس چئیرمین اینڈ سی ای او سلطان احمد بن صلائم نے دستخط کئے۔اس موقعہ پر وزیر اعظم نریندر مودی اور ابو ظہبی کے شہزادے محمد بن زائد النیہان بھی موجود تھے۔یہ تقریب ابو ظہبی کے صدارتی محل میں منعقد ہوئی ۔اس تاریخی ایم او یو کی بدولت جموں وکشمیر کواگلے 5برسوں تک5 ہزار کروڑ روپے کا ایف ڈی آئی جوائنٹ وینچر کے تحت حاصل ہوگا۔پہلے مرحلے میں دوبئی پورٹس کے ذریعے1500کروڑ مختلف النوع لاجسٹک پارکس(ڈری پورٹ)کیلئے سرمایہ کئے جائیں گے۔ڈاکٹر درابو نے کہا کہ مجوزہ پارکیں سانبہ جموں اور اوم پورہ کشمیر میں قائم کی جائیں گی۔ انہوں نے کہا کہ اس پروجیکٹ سے نہ صرف ٹرانسپورٹ کرایہ میں کمی آئے گی بلکہ پیداوار اور فصل کو مارکیٹنگ سہولیت بھی فراہم ہوگی۔