نیوز ڈیسک
نئی دہلی// قومی تحقیقاتی ایجنسی (NIA) نے کہا ہے کہ اس نے جماعت اسلامی سے منسلک جموں و کشمیر میںٹیرر فنڈنگ کیس میں چار گرفتار ملزمین کے خلاف ایک خصوصی عدالت میں چارج شیٹ داخل کی ہے۔این آئی اے کے کے مطابق جن لوگوں کے خلاف چارج شیٹ داخل کی گئی ہے ان میں جاوید احمد لون، عادل احمد لون، منظور احمد ڈار اور رمیز احمد کونڈو شامل ہیں، یہ سبھی جموں و کشمیر کے گاندربل ضلع کے رہنے والے ہیں۔ چارج شیٹ غیر قانونی سرگرمیاں (روک تھام) ایکٹ، اسلحہ ایکٹ اور تعزیرات ہند کی مختلف دفعات کے تحت داخل کی گئی ہے۔NIA نے ایک بیان میں کہا کہ جماعت اسلامی کے ممبران اور کیڈروں کے خلاف 28 فروری 2019 میں مقدمہ درج کیا گیا تھا ۔”وہ اندرون ملک کے ساتھ ساتھ بیرون ملک سے بھی عطیات کے ذریعے، خاص طور پر زکوٰۃ، اور بیت المال کی شکل میں، خیراتی اور دیگر فلاحی سرگرمیوں کے لیے فنڈز اکٹھے کر رہے تھے، لیکن انھوں نے اسے پرتشدد اور علیحدگی پسند سرگرمیوں کی حوصلہ افزائی کے لیے استعمال کیا۔ اس نے مزید کہا کہ این آئی اے نے 5 فروری 2021 کو مقدمہ از خود درج کیا تھا۔اس معاملے کی تحقیقات سے یہ بات سامنے آئی ہے کہ ملزم جاوید احمد لون جے آئی، جے کے کے نام سے فنڈز مانگ رہا ہے اور میٹنگیں منعقد کر رہا ہے۔مزید یہ کہ، دونوں ملزمین جاوید احمد لون اور عادل احمد لون نے ساتھی ملزمین سے مذموم مقاصد کے ساتھ آتشیں اسلحہ اور گولہ بارود حاصل کیا تھا،‘‘ ۔
