یو این آئی
نئی دہلی//وزیر دفاع راج ناتھ سنگھ نے کہا ہے کہ تیزی سے بدلتے ہوئے حالات میں جدید ترین ٹیکنالوجی میں مہارت حاصل کرنا بہت ضروری ہے اور فوجی تربیتی مراکز نے فوجیوں کو اس سے لیس کرنے میں اہم کردار ادا کیا ہے۔ وزارت دفاع نے پیر کو کہا’’آج کے ہمیشہ سے بدلتے وقت میں، ٹیکنالوجیز میں مہارت حاصل کرنا وقت کی ضرورت ہے اور فوجی تربیتی مراکز ہمارے فوجیوں کو مستقبل کے چیلنجز کا سامنا کرنے کی بخوبی تربیت دے رہے ہیں‘‘۔ جنگ کے طریقوں میں آنے والی بنیادی تبدیلیوں پر روشنی ڈالتے ہوئے انہوں نے کہا کہ انفارمیشن وارفیئر، مصنوعی ذہانت پر مبنی جنگ، پراکسی وار، الیکٹرو میگنیٹک وار، خلائی جنگ اور سائبر حملے جیسے غیر روایتی طریقے آج کے دور میں ایک بڑا چیلنج ہے۔ وزیر دفاع نے ایسے چیلنجوں سے نمٹنے کے لیے فوج کو تربیت یافتہ اور لیس رہنے کی ضرورت پر زور دیا۔ انہوں نے کہا کہ مہو ٹریننگ سنٹر ان کوششوں میں گراں قدر تعاون کر رہا ہے۔انہوں نے بدلتے وقت کے ساتھ تربیتی نصاب میں مسلسل بہتری لانے اور اہلکاروں کو ہر قسم کے چیلنج سے لڑنے کے لیے تیار کرنے پر سینٹرز کی تعریف کی۔ 2047تک ملک کو ترقی یافتہ بنانے کے حکومت کے وژن کو اجاگر کرتے ہوئے سنگھ نے موجودہ دور کو عبوری دور قرار دیا۔ انہوں نے کہا کہ ہندوستان مسلسل ترقی کی راہ پر گامزن ہے اور تیزی سے مینوفیکچرنگ ہب کے طور پر ابھر رہا ہے۔ فوجی نقطہ نظر سے ہمیں جدید ہتھیاروں سے لیس کیا جا رہا ہے۔ ہم ہندوستان میں تیار کردہ آلات دوسرے ممالک کو بھی برآمد کر رہے ہیں۔ انہوں نے کہا ’’دفاعی برآمدات، جو ایک دہائی قبل تقریبا 2,000 کروڑ روپے تھیں، آج 21,000 کروڑ روپے کے ریکارڈ کو عبور کر چکی ہیں۔ ہم نے 2029 تک 50,000 کروڑ روپے کی برآمد کا ہدف مقرر کیا ہے۔وزیر دفاع نے تینوں سروسز کے درمیان انضمام اور مشترکہ تعاون کو مضبوط بنانے کے حکومت کے عزم کا اعادہ کیا اور اس اعتماد کا اظہار کیا کہ آنے والے وقت میں مسلح افواج مل کر چیلنجوں کا بہتر اور زیادہ موثر انداز میں مقابلہ کرنے کے قابل ہو جائیں گی‘‘۔ انہوں نے کہا کہ مہو کنٹونمنٹ میں تمام ونگز کے افسران کو اعلی سطح کی تربیت دی جاتی ہے۔ انہوں نے افسران پر زور دیا کہ وہ انفنٹری اسکول میں ہتھیاروں کی تربیت، اے آئی اور ملٹری کالج آف ٹیلی کمیونیکیشن انجینئرنگ میں کمیونیکیشن ٹیکنالوجی اور اے ڈبلیو سی ایس میں جونیئر اور سینئر کمانڈز میں قیادت جیسے شعبوں میں تربیت کے ذریعے انضمام کو فروغ دینے کے امکانات کو تلاش کریں۔
سنگھ نے کہا کہ مستقبل میں کچھ افسران دفاعی اتاشی کے طور پر کام کریں گے اور انہیں عالمی سطح پر قومی مفادات کو محفوظ بنانے کی کوشش کرنی چاہئے۔ انہوں نے کہا جب آپ ڈیفنس اتاشی کا عہدہ سنبھالیں گے تو آپ کو حکومت کے آتم نر بھر بھارت کے وژن کو اپنانا چاہیے۔ صرف خود انحصاری کے ذریعے ہی ہندوستان اپنی دفاعی صلاحیتوں کو مضبوط بنا سکتا ہے اور عالمی سطح پر زیادہ عزت حاصل کر سکتا ہے۔ انہوں نے کہا کہ معاشی خوشحالی اسی وقت ممکن ہے جب سیکورٹی پر پوری توجہ دی جائے گی ۔ اسی طرح سیکورٹی کا نظام تب ہی مضبوط ہوگا جب معیشت مضبوط ہوگی۔ دونوں ایک دوسرے کی تکمیل کرتے ہیں۔” سنگھ نے کہا کہ 2047 تک ہم نہ صرف ایک ترقی یافتہ قوم بن جائیں گے بلکہ ہماری مسلح افواج دنیا کی جدید ترین اور مضبوط ترین افواج میں سے ایک ہوگی۔ مسٹر سنگھ نے افسران سے ڈاکٹر بی آر امبیڈکر کی لگن اور جذبے کی قدروں کو اپنانے کی بھی تاکید کی۔ انہوں نے بابا صاحب کو نہ صرف ہندوستانی آئین کا معمار بلکہ ایک صاحب بصیرت رہنما کے طور پر بھی بیان کیا۔ انہوں نے لوگوں بالخصوص نوجوانوں کو ان کی اقدار اور نظریات سے روشناس کرانے کے لیے حکومت کے عزم کا اعادہ کیا۔ سرحدوں کو محفوظ بنانے اور قدرتی آفات کے دوران سب سے پہلے جواب دینے کے لیے مسلح افواج کی تعریف کرتے ہوئے وزیر دفاع نے کہا “قوم کی حفاظت کے لیے یہ لگن اور بدلتی ہوئی دنیا میں خود کو اپ ڈیٹ رکھنے کا یہ جذبہ ہمیں دوسروں سے آگے لے جاتا ہے‘‘۔ قبل ازیں وزیر دفاع نے انفنٹری میموریل پر پھولوں کی چادر چڑھائی اور بہادروں کو خراج عقیدت پیش کیا۔
