عظمیٰ نیوز سروس
ٹوکیو// جاپان نے 80 سال میں پہلی بار اپنی سر زمین پر میزائل کا تجربہ کیا ہے ، جس کی رینج 62 میل ہے ۔خبر رساں ایجنسی اے پی کی ایک رپورٹ کے مطابق ہوکائیڈو جزیرے پر زمین سے جہاز تک مار کرنے والے میزائل کا تجربہ کیا گیا۔رپورٹ کے مطابق جاپانی فوج اپنے فوجی ڈھانچے کو مضبوط بنا رہی ہے ، جاپان نے گزشتہ میزائل تجربات امریکہ اور آسٹریلیا کے ساتھ مل کر کیے تھے ۔یہ تجربہ جاپان کے شمالی علاقے ہوکا ئیڈو میں کیا گیا، جہاں “ٹائپ 88[؟] نامی ایک میزائل کو ایک خالی کشتی پر داغا گیا جو ساحل سے 40 کلومیٹر دور تھی۔رپورٹ میں مزید کہا گیا ہے کہ یہ میزائل زمین سے سمندر میں مار کرنے والا ہے اور اس کا فاصلہ تقریباً 100 کلومیٹر (62 میل) ہے ۔اس حوالے سے جاپان کے فوجی حکام کا کہنا ہے کہ یہ تجربہ کامیاب رہا اور آئندہ اتوار تک ایک اور میزائل تجربہ بھی متوقع ہے ۔اس تجربے کے خلاف درجنوں افراد نے احتجاج کیا۔ ان کا کہنا تھا کہ ایسے تجربات سے ایشیا میں کشیدگی بڑھے گی اور جاپان جنگ میں شامل ہوسکتا ہے ۔رپورٹ کے مطابق یہ قدم جاپان کی نئی دفاعی پالیسی کا حصہ ہے جس کا مقصد چین کی بڑھتی ہوئی سمندری سرگرمیوں کو روکنا ہے ۔ جاپان کو چین اور روس کی مشترکہ فوجی مشقوں پر بھی تشویش ہے جو جاپانی سمندری علاقوں کے قریب ہو رہی ہیں۔
