عظمیٰ نیوز سروس
راجوری//حالیہ سرحدی کشیدگی کے بعد وزیر برائے جل شکتی، جنگلات، ماحولیات و قبائلی امور جاوید احمد رانا نے راجوری کا دورہ کیا اور صورتحال کا جائزہ لینے کے ساتھ ساتھ امدادی اقدامات پر بھی غور کیا۔وزیر موصوف نے ضلع افسران اور منتخب نمائندوں کے ساتھ ایک اعلیٰ سطحی اجلاس کی صدارت کی، جس میں ترقیاتی سرگرمیوں کا جائزہ لیا گیا۔ اس موقع پررانا نے کہا کہ سرحدی علاقوں میں بسنے والے شہریوں کی سلامتی اور تحفظ حکومت کی اولین ترجیح ہے۔انہوں نے افسران کو ہدایت دی کہ کمیونٹی بنکروں کی شناخت اور تعمیر کا عمل جنگی بنیادوں پر مکمل کیا جائے۔ ڈپٹی کمشنر نے اجلاس کو بتایا کہ لائن آف کنٹرول کے قریبی علاقوں میں رہنے والی آبادی کو تحفظ فراہم کرنے کے لئے میونسپل کمیٹیوں کے تحت وارڈ سطح پر ٹیمیں تشکیل دی گئی ہیں، جو مناسب جگہوں کی نشاندہی کر رہی ہیں۔انہوں نے یہ بھی بتایا کہ منریگا کے تحت سرحدی علاقوں میں کمیونٹی خندقیں کھودنے کا کام بھی شروع کر دیا گیا ہے۔وزیر نے متعلقہ محکموں کو متاثرہ خاندانوں کو معاوضہ جلد فراہم کرنے کی ہدایت دی اور کہا کہ زمینی سطح پر جائزہ لے کر انفراسٹرکچر کی منصوبہ بندی کی جائے۔اجلاس میں راجوری اور بدھل حلقوں کے ایم ایل ایز کے ساتھ ساتھ ڈی ڈی سی چیئرمین ایڈووکیٹ نسیم لیاقت نے صحت محکمہ میں عملے کی کمی سمیت دیگر اہم مسائل اٹھائے۔وزیر نے عوامی نمائندوں کو یقین دلایا کہ ان کے مسائل کو ترجیحی بنیادوں پر حل کیا جائے گا۔ انہوں نے حکومت کی قبائلی عوام کی فلاح و بہبود کے لئے جاری اسکیموں کا بھی ذکر کیا اور کہا کہ ان کی سماجی و اقتصادی بہتری، تعلیم اور صحت کی سہولیات کی فراہمی حکومت کا مقصد ہے۔اجلاس میں ڈی ڈی سی چیئرمین ایڈووکیٹ نسیم لیاقت، ایم ایل اے بدھل جاوید اقبال چودھری، ایم ایل اے راجوری افتخار احمد، وائس چیئرمین ڈی ڈی سی شبیر خان، ڈی ڈی سی ممبران عبدالرشید، اقبال ملک، رمیشور سنگھ، خالد حسین، راجندر شرما، شمیم اختر، اور متعدد اعلیٰ افسران شامل تھے۔
وزیر نے ڈاکٹر تھاپا کو خراج عقیدت پیش کیا
عظمیٰ نیوز سروس
راجوری//وزیر برائے جل شکتی، جنگلات، ماحولیات و قبائلی امورجاوید احمد رانا نے ہفتہ کے روز لائن آف کنٹرول (ایل او سی) پر شیلنگ کے دوران شہید ہونے والے سینئر جموں و کشمیر انتظامی سروس افسر ڈاکٹر راج کمار تھاپا کو پْراثر خراج عقیدت پیش کیا۔راجوری میں ترقیاتی سرگرمیوں کا جائزہ لینے کے لئے بلائے گئے ایک اعلیٰ سطحی اجلاس میں، جس میں ارکانِ اسمبلی، ڈی ڈی سی ممبران اور ضلعی انتظامیہ کے افسران شامل تھے، وزیر موصوف نے ڈاکٹر تھاپا کی شاندار انتظامی خدمات اور ان کی عوامی فلاحی کوششوں کو سراہا۔اجلاس کا آغاز ڈاکٹر تھاپا کی عظیم قربانی کو خراج پیش کرتے ہوئے ایک منٹ کی خاموشی سے کیا گیا۔ وزیر نے کہا کہ ڈاکٹر تھاپا کی دیانتداری، محنت اور عوام دوست رویے نے انہیں عوام اور ساتھیوں میں بے حد احترام دلایا۔اجلاس کے دوران جنگ بندی کے بعد کے حالات اور متاثرہ خاندانوں کے لئے جاری معاوضہ عمل کا تفصیلی جائزہ بھی لیا گیا۔وزیر رانا نے کہا کہ ڈاکٹر تھاپا کی خدمات راجوری ضلع کی ترقی میں ایک سنگِ میل ثابت ہوئیں اور ان کی یاد ہمیشہ زندہ رہے گی۔اجلاس میں شامل تمام شرکاء نے شہید افسر کی خدمات کو خراجِ تحسین پیش کیا اور ان کے اہل خانہ کے ساتھ تعزیت کا اظہار کیا۔
