عظمیٰ نیوزسروس
جموں//وزیر برائے جل شکتی، جنگلات و ماحولیات اور قبائلی امور جاوید احمد رانا نے گجر اور بکروال پی جی بوائز ہوسٹل جموں میں سہولیات کا جائزہ لیا۔اپنے دورے کے دوران اُنہوںنے طلبأ سے بھی بات چیت کی اور اُن کی حوصلہ افزائی کی کہ وہ اپنا وقت اور توانائی مزید نتیجہ خیز سرگرمیوں کے لئے وقف کریں۔اِس موقعہ پر وزیرموصوف نے خطاب کرتے ہوئے کہا کہ حکومت رہنے والوں کو درپیش مسائل سے بخوبی آگاہ ہے اور طلبأ کمیونٹی کو مطلوبہ سہولیات کی فراہمی کے لئے پُرعزم ہے۔جاوید احمد رانانے ہوسٹل میں طلبأ کی مدد کی مختلف خدمات بشمول لائبریری، ہوسٹل کی سہولیات، کتابوں کا اچھا ذخیرۂ اور دیگر طلباء کی فلاحی خدمات پر بھی تبادلہ خیال کیا۔اُنہوں نے ڈائریکٹر قبائلی امور کو ہدایت دی کہ وہ طلباء کمیونٹی کے فائدے کی خاطر بہتر سہولیات کے لئے ایکشن پلان تیار کریں تاکہ طلبأ کے لئے سازگار ماحول پیدا کیا جاسکے۔ اُنہوں نے کہا کہ اِس اَقدام کا مقصد معاشرے کے پسماندہ طبقوں کے بچوں کے لئے تعلیمی سہولیات کا دائرہ کار بڑھانا ہے۔وزیر موصوف نے کہا کہ منتخب حکومت کی ذمہ داری ہے کہ وہ طلبأ کو تمام سہولیات فراہم کرے جو ہمارے ملک کا مستقبل ہیں۔اُنہوں نے طلبأ کو پڑھنے کی عادات پیدا کرنے کی ترغیب دیتے ہوئے کہا کہ پڑھنے سے علم کی بنیاد اور حکمت میں اِضافہ ہوتا ہے۔وزیر نے کہا کہ نوجوانوں کو کتابوں سے جوڑنے اور بچوں میں پڑھنے کی عادت پیدا کرنے کی ضرورت ہے جس کے لئے لائبریریوں کی مضبوطی اور اچھی کتابوں کی دستیابی بہت ضروری ہے۔
