جائیداد کے سالانہ گوشوارے جمع نہ کرنے والے ملازمین

سرینگر//سرکاری ملازمین کی اچھی خاصی تعداد کی طرف سے جائیداد کے گوشواروں کی تفصیلات جمع کرانے میں ناکام رہنے کے بعد، حکومت نے جمعرات کو نادہندہ ملازمین کو’’آخری موقع‘ دینے کا فیصلہ کرتے ہوئے اس میں28مارچ تک توسیع کردی ہے۔سرکار کی جانب سے جاری نوٹیفکیشن کے مطابق ملازمین اب 22 سے 28 مارچ تک جائیداد کے سالانہ گوشوارے تفصیلات جمع کرا سکتے ہیں۔ حکومت نے گزشتہ سال 22 دسمبر کو سرکیولر (نمبر 56-JK(GAD) آف 2021)کے ذریعے، تمام ملازمین کو تفصیلی ہدایات جاری کیں کہ وہ’ پی آر ایس‘ پورٹل پر خود کو رجسٹر کریں اور اس کے بعد لازمی طور پر سال 2021 کے لیے اپنی سالانہ جائیداد کے گوشوارے یکم جنوری سے 31تک جمع کریں۔ نوٹیفکیشن میں کہا گیا ہے’گوشوارے جمع کرانے کا عمل 31جنوری2022کو بند ہونا چاہیے تھا، تاہم، ملازمین کی طرف سے آن لائن موڈ کے ذریعے جائیداد کے گوشوارے جمع کرانے کی آخری تاریخ 15فروری2022تک بڑھا دی گئی تھی‘۔نوٹیفکیشن میں کہا گیا ہے’’تاہم، پراپرٹی ریٹرن جمع کرانے کی تاریخ میں توسیع کے باوجود، یہ دیکھا گیا ہے کہ مختلف ملازمین اپنی جائیداد کے گوشوارے جمع کرانے میں ناکام رہے ہیں اور اس طرح اس لازمی عمل میں کوتاہی کر چکے ہیں‘‘۔مزید کہا گیا ہے کہ اس بات کا بھی مشاہدہ کیا گیا کہ مختلف ملازمین نے پورٹل پر خود کو رجسٹر کیا لیکن انہوں نے اپنی پراپرٹی ریٹرن جمع نہیں کرائے ہیں، اس طرح انہوں نے بھی اپنی تفصیلات جمع کرانے میں غلطی کی ۔ نوٹیفکیشن کے مطابق’’سرکاری ملازمین کی جانب سے جائیداد کی تفصیلات جمع کرنے میں ناکامی، جموں و کشمیر پبلک مین اینڈ پبلک سرونٹ ڈیکلریشن آف ایسٹس ایکٹ اور اس کے تحت بنائے گئے قواعد کے تحت تعزیری کارروائی کے زمرے میں آتا ہے ،مزید نادہندہ ملازمین انسداد بدعنوانی ایکٹ کے تحت مجرمانہ بدانتظامی کے مرتکب ہوں گے اور مذکورہ ایکٹ کے تحت سزا کے مستحق ہوں گے۔ نوٹیفکیشن میں کہا گیا ہے کہ پراپرٹی ریٹرن جمع نہ کرانے کے نتیجے میں ایسے ملازمین کی ویجیلنس کلیئرنس سے انکار ہو جائے گا۔حکومت نے کہا کہ اس معاملے پر دوبارہ جنرل ایڈمنسٹریشن ڈپارٹمنٹ میں غور کیا گیا اور یہ فیصلہ کیا گیا ہے کہ ان نادہندہ ملازمین کو ایک آخری موقع دیا جا سکتا ہے جو مقررہ وقت کے اندر اپنی پراپرٹی ریٹرن جمع کرانے میں ناکام رہے ہیں۔ نوٹیفکیشن کے مطابق’’"اس کے بعد، مزید موقع نہیں دیا جائے گا اور نادہندگان کے خلاف کارروائی شروع کی جائے گی۔‘‘" نوٹیفکیشن  کے مطابق ’’، نادہندہ ملازمین کو پراپرٹی ریٹرن پر آن لائن موڈ کے ذریعے پورٹل پر جمع کرانے کی اجازت22مارچ سے28مارچ2022تک ہوگی۔نوٹیفکیشن میں کہا گیا کہ وہ تمام ملازمین جنہوں نے اپنے آپ کو پورٹل پر رجسٹر کیا لیکن اپنے پراپرٹی ریٹرن جمع نہیں کرائے ہیں، اس کے علاوہ، غیر رجسٹرڈ ملازمین خود کو پورٹل پر رجسٹر کرائیں  اور بعد ازاں مقررہ مدت کے اندر اپنے پراپرٹی ریٹرن جمع کرائیں۔کارپوریشنوں اور نیم خود مختار اداروں  میں تنخواہوں کو واگزار کرنے  والے افسران کو بھی اپنے ملازمین کو رجسٹر کرنے کی ہدایت دی گئی ہے۔