یواین آئی
اسٹوانگر (ناروے )/ عالمی چیمپئن گوکیش ڈوماراجو نے ناروے شطرنج ٹورنامنٹ کے تیسرے راؤنڈ میں شاندار کارکردگی کا مظاہرہ کرتے ہوئے ہکارو ناکامورا کو ہرا کر اپنی دعویداری کو مضبوط کر لیا۔ اس سے قبل گوکیش کو پہلے دو راؤنڈز میں میگنس کارلسن اور ارجن ایریگئی سے شکست کا سامنا کرنا پڑا تھا۔ آج اپنی 19ویں سالگرہ منا رہے ڈی گوکیش نے 42 چالوں میں دنیا کے دوسرے نمبر کے کھلاڑی ناکامورا کو شکست دی۔اب چوتھے راؤنڈ میں گوکیش کا مقابلہ فیبیانو کاروانا سے ہوگا۔ گوکیش فی الحال پانچویں پوزیشن پر ہیں جبکہ سرفہرست امریکہ کے فیبیانو کاروانا ہیں۔ناروے شطرنج خاتون ٹورنامنٹ میں ایک بار پھر ہندوستانی اسٹار ہمپی کونیرو نے شاندار کھیل کا مظاہرہ کرتے ہوئے فیصلہ کن جیت درج کی۔ ہمپی کونیرو نے شروع سے ہی مخالف کھلاڑی پر شاندار کھیل کے ذریعے دباؤ برقرار رکھا اور جیت حاصل کی۔
