سرینگر//ہماری حکومت اورانتظامیہ کی نکتہ چینی کرنے والے مبصرین،تجزیہ نگاراورکالم نویسوں کاآج کہیں نام ونشان نہیں ،یہ سب کچھ ایسے ماحول کی دین ہے جہاں حکومت کی مخالفت کرناگناہ سمجھاجاتاہے۔اس بات کااظہار نیشنل کانفرنس کے نائب صدرعمرعبداللہ نے یہاںتنویرصادق کے پارٹی ترجمان اعلیٰ کاعہدہ سنبھالنے کے موقعہ پرمنعقدہ تقریب سے خطاب کرتے ہوئے کیا۔انہوں نے ترجمانِ اعلیٰ تنویر صادق سمیت پارٹی میڈیا ٹیم کے ممبران کومبارکباد پیش کرتے ہوئے اُمید ظاہر کی کہ یہ ٹیم پارٹی کے نصب العین کے ساتھ ساتھ لوگوں کے مسائل و مشکلات خوش اسلوبی کیساتھ اُجاگر کریں گی اور ہماری توقعات پر کھرے اُتریں گے۔ اُن کاکہنا تھا کہ موجودہ دور میں جہاں ذرائع ابلاغ پر بہت زیادہ دبائو ہے اور کوئی بھی سچ لکھنے یا بولنے کی جرأت نہیں کرپا رہاہے، ایسے میں پارٹی کی میڈیا ونگ کی ذمہ داریاں اور بڑھ جاتی ہیں۔ انہوں نے کہا کہ ہمارے دورِ حکومت میں جو اخبارات حکومت اور انتظامیہ کی نکتہ چینیوں سے بھر ے ہوتے تھے اور جو مبصرین، تجزیہ نگار اور کالم نویس بڑے بڑے کالم لکھا کرتے تھے ، وہ خاموش ہوگئے ہیں، اُن کا آج کہیں نام و نشان نہیں۔ یہ سب کچھ ایک ایسے ماحول کی دین ہے جہاں حکومت کی مخالفت کرنا گناہ سمجھا جاتا ہے۔ یہاں آج ایک صحافی کو پی ایس اے کے تحت بند رکھا گیا ہے اور اُس پر الزام ہے کہ وہ حکومت کی تعریف نہیںکرتا ہے۔ عمر عبداللہ نے کہا کہ ایک ایسے ماحول میں جہاں حکومتی سطح پر جھوٹ کا بول بالا ہے وہاں ہماری میڈیا ونگ کی ذمہ داری بنتی ہے کہ وہ سچ کو عوام تک پہنچائے۔ انہوں نے پارٹی میڈیا ونگ سے کہاکہ نیشنل کانفرنس صدر ڈاکٹر فاوق عبداللہ سے لیکر ایک چھوٹے کارکن تک پوری پارٹی آپ کی پشت پر ہے۔ تقریب پر پارٹی خواتین ونگ کی ریاستی صدر شمیمہ فردوس، سینئر لیڈران عرفان احمد شاہ، پیر محمد حسین، ایڈوکیٹ شوکت احمد میر، احسان پردیسی، انجینئر صبیہ قادری، سلمان علی ساگر، غلام نبی وانی تیل بلی، قیصر جلالی، ڈاکٹر سعید اور دیگر عہدیداران بھی موجود تھے۔
تنویر صادق نے نیشنل کانفرنس ترجمانِ اعلیٰ کاعہدہ سنبھالا
