حیدرآباد//تلنگانہ کے گورنر نرسمہن نے تلنگانہ اسمبلی کو تحلیل کرنے کی سفارش قبول کرلی اور وزیراعلیٰ چندرشیکھر راو سے کہا کہ وہ آئندہ انتظامات تک نگراں وزیر اعلیٰ کی ذمہ داری ادا کریں جس سے مسٹر راو نے اتفاق کیا۔ قبل ازیں تلنگانہ اسمبلی کو تحلیل کرنے کی قرارداد کابینہ میں منظورکی گئی۔ریاستی اسمبلی کی تحلیل اور ریاست میں جلد انتخابات کے سلسلہ میں گزشتہ کئی دنوں سے اطلاعات گشت کر رہی تھیں۔اس خصوص میں آج ریاستی کابینہ کااجلاس وزیراعلی کے چندرشیکھرراو کی صدارت میں منعقد ہوا جس میں یہ فیصلہ کیاگیا۔یہ اجلاس تقریبا4.30منٹ میں ہی ختم ہوگیا۔اس قرارداد پر وزیراعلی کے چندرشیکھرراو نے دستخط کئے ۔اس اجلاس کے فوری بعد وزیراعلی کے چندرشیکھرراو خصوصی بس کے ذریعہ ریاستی وزرا کے ساتھ گورنر نرسمہن سے ملاقات کرنے کیلئے راج بھون روانہ ہوگئے تھے ۔ جہاں انہوں نے اسمبلی کو تحلیل کرنے کی کابینہ میں منظورہ قرارداد کی نقل گورنر کے حوالے کی ۔انہوں نے اسمبلی کو تحلیل کرنے کی وجوہات کے ساتھ ساتھ دیگر تمام صورتحال اور مستقبل کے لائحہ عمل سے ان کو واقف کروایا۔گورنر سے ملاقات کے فوری بعد وزیراعلی اسمبلی کے روبر و واقع گن پارک پہنچے جہاں انہوں نے تلنگانہ تحریک کے دوران جان کی قربانی دینے والوں کی یادگار پر پھول نچھاور کئے ۔اس طرح اب ریاست میں جلد انتخابات کی راہ ہموار ہوگئی ہے ۔ریاستی اسمبلی کے انتخابات لوک سبھا کے انتخابات کے ساتھ ہونے والے تھے ۔یواین آئی
تلنگانہ اسمبلی تحلیل
