جموں و کشمیر ہائر ایجوکیشن کونسل کی میٹنگ
سرینگر// لیفٹیننٹ گورنر منوج سِنہا نے بدھ کو راج بھون میں جموںوکشمیر ہائیر ایجوکیشن کونسل میٹنگ کی صدارت کی۔میٹنگ میں متعدد موضوعات کثیر الضابطہ تعلیم ، تحقیق اور اِختراع کے لئے ماحولیاتی نظام ، ہندوستاتی فلسفہ اور زبانیں اور پروجیکٹ پر مبنی سیکھنے کا طریقہ جو معاشرے کی ضروریات اور چیلنجوں پر غور و خوض کیا گیا ۔جموں یونیورسٹی کی طرف سے شروع کئے جانے والے ایک اِختراعی پروگرام ’’ ڈیزائن یور ڈگری ‘‘ کے بارے میں تجاویز بھی شیئر کی گئیں۔لیفٹیننٹ گورنر نے کہا کہ ’ڈیزائن یور ڈگری‘ قومی تعلیمی پالیسی 2020 کے بنیادوں میں سے ایک ہے۔اُنہوں نے مزید کہا کہ یہ 21ویں صدی کی ضروریات کے مطابق قابل اطلاق سیکھنے ، مہارت میں اِضافہ کو فروغ دے گا اور طلبا ء کو اَپنے نصاب کی تشکیل کا منفرد موقعہ فراہم کرے گا۔ اُنہو ںنے کہا کہ جموںوکشمیر یوٹی میں تعلیمی شعبے کے جاری تبدیلی کے سفر کا اِشتراک کرتے ہوئے تعلیم اور دیگر شعبوں میں تیز رفتار ترقی اور معاشرے کی اُبھرتی ہوئی ضروریات اور خواہشات کے لئے کلاس روموں میں تبدیلیوں اور نئے حل میں سیکھنے کے تعاون کی ضرورت ہے۔
لیفٹیننٹ گورنر نے کہا،’’ ہمارے امرت کال کا سفر صرف ڈگری کے بارے میں نہیں بلکہ مہارتوں اور اقدارا کے بارے میں بھی ہوگا۔‘‘اُنہوں نے روزگار کے نئے شعبوں کی نشاندہی کرنے اور سرکردہ ماہرین تعلیم کے ساتھ روابط بڑھانے پر زور دیا۔لیفٹیننٹ گورنر نے کہا ’’ پانچ سیز مستقبل کی حکمت عملی کے لئے تنقیدی تشخیص ضروری ہے۔ تنقیدی، سوچ، مواصلات ، تعاون اور تخلیقی صلاحیتوں، تجسس سے مساوی اور متحرک علمی معاشرے کی تعمیر ہوگی ۔‘‘اُنہوں نے یونیورسٹیوں پر تنقیدی جائزہ لینے اور طاقت اور کمزوری کی نشاندہی کرنے پر زور دیا۔اُنہوں نے مزید کہا کہ اس سے مستقبل کے اہداف کے حصول کے لئے مناسب حکمت عملی تیار کرنے میں مدد ملے گی۔اُنہوں نے کہا کہ نوجوانوں کے لئے متحرک ماحول پیدا کرنے کی خاطر کثیر الضابطہ منصوبوں کو فروغ دینے کی ضرورت ہے جو انہیں عالمی، اِقتصادی، سماجی، ثقافتی اور تکنیکی مسائل میں شامل کریں اور دنیا بھر میں ہونے والی تبدیلیوں کے مطابق ان کی رہنمائی کریں۔لیفٹیننٹ گورنر نے ہائیر ایجوکیشن کونسل کو مشورہ دیا کہ وہ مختلف طریقے تلاش کرے جو جموں و کشمیریوٹی کے اعلیٰ تعلیمی ماحولیاتی نظام کے لئے فائدہ مند ثابت ہو سکتے ہیں۔انہوں نے مزیدکہاکہ سابق طلباء کے نیٹ ورک کو مضبوط بنایا جائے۔اُنہوں نے کہا کہ طلباء اور اساتذہ کے تبادلے کے پروگراموں میں سہولیت فراہم کرنا اور یونیورسٹیوں اور دیگر اعلیٰ تعلیمی اداروں کی درجہ بندی کو بہتر بناناہے۔لیفٹیننٹ گورنر نے کہا کہ ہمیں امتحان میں اصلاحات کے لئے دہلی یونیورسٹی جیسی دیگر یونیورسٹیوں کے کامیاب ماڈلوں کا مطالعہ کرنا چاہیے۔وائس چانسلر جموں یونیورسٹی پروفیسر امیش رائے نے ’’ڈیزائن یور ڈگری‘‘ انڈرگریجویٹ پروگرام کا تفصیلی جائزہ پیش کیا۔پرنسپل سیکرٹری اعلیٰ تعلیم الوک کمار نے جموںوکشمیر یوٹی میں تعلیمی شعبے میں اصلاحات کے لئے کئے گئے اہم اقدامات پر روشنی ڈالی۔
