یو این آئی
نئی دہلی//مرکزی وزیر داخلہ امت شاہ نے جمعرات کو تریپورہ کے وزیر اعلیٰ ڈاکٹر مانک ساہا سے بات چیت کرکے ریاست میں سیلاب کی صورتحال کا جائزہ لیا۔ شاہ نے ضرورت پڑنے پر ریاستی حکومت کو مرکز سے ہر ممکن مدد کا یقین دلایا ہے۔وزارت داخلہ نے ایک بیان جاری کرکے کہا کہ بحران کی اس گھڑی میں مودی حکومت تریپورہ کے عوام کے ساتھ مضبوطی سے کھڑی ہے۔ انہوں نے کہا کہ مرکزی حکومت راحت اور بچا کاموں میں مقامی انتظامیہ کی مدد کیلئے ریاست میں نیشنل ڈیزاسٹر رسپانس فورس (این ڈی آر ایف) کی ٹیموں کے علاوہ کشتیاں اور ہیلی کاپٹر بھیج رہی ہے۔ شاہ نے سوشل میڈیا پلیٹ فارم ایکس پر ایک پوسٹ میں یہ بھی کہا ’’تریپورہ کے وزیر اعلی ڈاکٹر مانک ساہا سے بات کی اور ریاست میں سیلاب کی صورتحال کا جائزہ لیا۔ مرکز راحت اور بچا کے کاموں میں مقامی حکومت کی مدد کے لیے کشتیوں اور ہیلی کاپٹروں کے علاوہ این ڈی آر ایف کی ٹیمیں ریاست میں بھیج رہا ہے۔ ضرورت پڑنے پر مرکز سے ہر ممکن مدد کا یقین دلایا ہے ۔ بحران کی اس گھڑی میں مودی حکومت تریپورہ میں ہماری بہنوں اور بھائیوں کے ساتھ مضبوطی سے کھڑی ہے‘‘۔
