ترکی// کل جماعتی کشمیر رابطہ کونسل کے کنوینراور سابق امیر جماعت اسلامی پاکستانی زیر انتظام کشمیر عبدالرشید ترابی نے ترکی میں ایسام کے زیر اہتمام عالمی کانفرنس کے موقع پر کشمیریوں کے حق خود ارادیت کے حصول کے حوالے سے قرارداد پیش کی جو متفقہ طور پر منظورکرلی گئی ۔موصولہ بیان کے مطابق کانفرنس میں 55ممالک کے274مندوبین شریک تھے،جنہوںنے کشمیریوں کے حق میں قرارداد منظور کی ہے۔ بیان کے مطابق قرارداد میںلکھاگیا ہے کہ ہندوستان اقوام متحدہ کی قراردادوں کے مطابق کشمیریوں کو ان کا پیدائشی اور بنیادی حق فراہم کرے ، مظالم بندکرے اور انسانی حقوق کی خلاف ورزیوں اور پامالیوں کو روکے اور کشمیریوں کواپنے مستقبل کا فیصلہ کرنے کا حق فراہم کرے ۔ قرارداد میں اقوام متحدہ سے مطالبہ کیا گیا ہے کہ وہ کشمیریوںکو اپنے مستقبل کا فیصلہ کرنے کیلئے رائے شماری کا موقع فراہم کرے ۔ مندوبین نے متفقہ طور پر کشمیریوں کے حق خود ارادیت کے حصول کی حمایت کا اعلان کیا ۔ کانفرنس میں سرکاری ، غیر سرکاری مندوبین اسلامی تحریکوں کے قائدین ، انسانی حقوق کی تنظیموں کے سربراہان ، اہل دانش اور سفارت کار شریک تھے۔واضح رہے کہ یہ ادارہ ترکی کے سابق وزیر اعظم نجم الدین اربکان نے قائم کیا تھا ،جوہر سال ترکی میں امت کے مسائل اور ان کے حل کے حوالے سے عالمی کانفرنس کاانعقاد کرتا ہے۔
ترکی کانفرنس میںکشمیریوں کی حمایت، قرارداد منظور
