عظمیٰ نیوز سروس
سرینگر//کشمیر صوبے کے مختلف اضلاع سے تعلق رکھنے والے ترقی پسند کسانوں کے ایک گروپ کو کل ڈائریکٹر زراعت کشمیر محمد الیاس خطیب نے ایک بین ریاستی نمائش اور تربیتی پروگرام کے لیے جھنڈی دکھا کر روانہ کیا۔پانچ روزہ تربیتی پروگرام کا انعقاد ڈپٹی ڈائریکٹوریٹ آف ایگریکلچر (ٹریننگ) نے NMAET (ATMA) انٹر اسٹیٹ 2024-25 کے تحت کیا ہے۔محمد الیاس خطیب نے ترقی پسند کاشتکاروں پر زور دیا کہ وہ سائنسی خطوط پر فصلوں کی کاشت کے جدید طریقوں سے واقف ہونے کے لیے ماہرین زراعت، ماہرین اور توسیعی کارکنان سے بات چیت کریں۔ انہوں نے کاشتکاروں سے کہا کہ وہ فصلوں کی کاشت کاری کے شعبے میں اپنی تکنیکی مہارتوں میں اضافہ کریں اور اس طرح کی تربیت / نمائش کے دوروں سے سیکھنے کے بعد جدید ٹیکنالوجی کو اپنائیں۔
