ارشاد احمد
گاندربل//گاندربل کے تحصیل واکورہ کے متعدد علاقوں میں تربوزے کی فصل کو نامعلوم بیماری لاحق ہونے سے لاکھوں روپے مالیت کے تربوزے کی فصل تباہی کے دہانے پر ہے اورکسانوں میں تشویش کی لہر دوڑ گئی ہے۔تحصیل واکورہ کے درجنوں علاقوںززنہ، بادام پورہ، بٹہ وینہ ،واکورہ سمیت دیگر علاقوں میں سینکڑوں کنال اراضی پر بڑے پیمانے پر تربوزے کی فصل کی کاشت کی جاتی ہے جس سے کسانوں میں خاطر خواہ آمدنی کا فائدہ پہنچتا ہے تاہم رواں سال بدقسمتی سے جن علاقوں میں تربوزے کی فصل کی کاشت کی گئی ہے ان میں نامعلوم مہلک بیماری لاحق ہونے سے تربوزے کی فصل متاثر ہوگئی ہے جس وجہ سے کسانوں میں زبردست تشویش کی لہر دوڑ گئی ہے۔اس سلسلے میں علاقے سے منسلک کسانوں نے اگرچہ محکمہ زراعت کے اعلی حکام سے رابطہ کرکے اس نامعلوم بیماری کی جانب توجہ مبذول کرائی تھی لیکن محکمہ نے اس جانب سنجیدگی کا مظاہرہ نہیں کیا جس کی وجہ سے کسانوں میں غصہ اور مایوسی چھاگئی ہے۔اس بارے میں مقامی کسانوں کے وفود نے کشمیر عظمی کو بتایا کہ (کشمیر میں زرعی یونیورسٹی کشمیر اور زرعی علمی مرکز( کرشی وگیان کیندرجیسے ادارے موجود ہیں جن کا کام یہ ہے کہ موسمی تبدیلی اور حالات کے مطابق زمینداروں، کسانوں اور کاشتکاروں کو معقول جانکاری اور مشورے کرنے ہوتے ہیں لیکن بدقسمتی سے دونوں اداروں کے حکام کی لاپرواہی اور غفلت شعاری کی وجہ سے لاکھوں روپے مالیت کی فصل تباہ ہوکر رہ جاتی ہے۔انہوں نے کہا کہ ’ہم موجودہ حکومت سے مطالبہ کرتے ہیں کہ وہ متاثرہ علاقوں میں فوری طور پر ماہرین پر مشتمل ٹیموں کو روانہ کیا جائے تاکہ تربوزے سمیت دیگر فصل کو مکمل طور پر تباہ ہونے سے بچایا جاسکے‘۔
