سید اعجاز
ترال//گورنمنٹ پرائمری سکول جواہر پورہ لام ترال میں 50بچوں کو پڑھانے کیلئے فقط ایک استاد تعینات ہے جس پر والدین نے برہمی کا اظہار کرتے ہوئے مزید اساتذہ کو تعینات کرنے کا مطالبہ کیا ۔سکول میں زیر تعلیم بچوں کے کچھ والدین نے بتایا کہ گزشتہ اڈھائی ماہ سے یہاں صرف ایک استاد تعینات ہے ۔حیرت کی بات یہ ہے کہ دوسرے استاد کواپنی حاضری اسی سکول میں کرنے کے باوجود ڈیوٹی دوسرے سکول میں دینی پڑ تی ہے ۔لوگوں نے بتایا کہ یہ ان کے بچوں کے مستقبل کے ساتھ کھلواڑ ہے ۔اس دوردراز زون لرگام کے دیگر کئی سکولوں سے بھی اسی طرح کی شکایات موصول ہو رہی ہیں جہاں بچے زیادہ اورعملہ کم تعینات ہے۔مقامی لوگوں نے بتایاکہ قصبے اور میدانی علاقوں میں سرکاری تعلیمی اداروں میں بچے نہ ہونے کے برابر ہیں اور عملہ دوگنا ہے ۔انہوں نے بتایا کہ اگر کسی بھی میدانی علاقے کے استاد کو دیہی علاقوں میں تعینات کیا جاتا ہے تو وہ راتوں رات اپنی تبدیلی کرنے میں کامیاب ہوتا ہے۔ اس دوران سٹینڈنگ کمیٹی ایجو کیشن پلوامہ کے چیئر مین ڈاکٹر ہر بخش سنگھ نے بتایا کہ سب ضلع ترال کے تعلیمی اداروں میں بالکل ایسا ہی ہے ،اکثر عملہ سفارش اور باقی طرف داری کی بنیاد پر گھروں کے آس پاس ہی ڈیوٹی دیتے ہیں جبکہ دیہی علاقوں میں بچوں کی بڑی تعداد ہونے کے باجود عملے کی کمی ہے۔ انہوں نے بتایا کہ اس مسئلے کابہت جلد ایک میٹنگ میں جائزہ لیا جائے گا ۔
