یو این آئی
سرینگر// پی ڈی پی صدر اور سابق وزیر اعلیٰ محبوبہ مفتی نے قومی نشان والی تختی نصب کرنے کے ذمہ داروں کے خلاف قانونی کارروائی کرنے کا مطالبہ کیا۔انہوں نے حکام پر متعلقہ قوانین کے تحت کارروائی کرنے کی تاکید کرتے ہوئے کہا کہ اس واقعے سے لوگوں کے مذہبی جذبات مجروح ہوئے ہیں۔موصوف سابق صدر نے ان باتوں کا اظہار ہفتے کو ایک پریس کانفرنس سے خطاب کے دوران کیا۔انہوں نے کہا’’پی ڈی پی اور نیشنل کانفرنس کی سرکاروں کے دوران بھی حضرت بل میں تعمیراتی کام کیا گیا لیکن ایسی حرکت کبھی نہیں کی گئی جس سے لوگوں خاص طور پر کشمیری مسلمانوں کے مذبی جذبات مجروح ہوں‘‘۔ان کا کہنا تھا’’ذمہ داروں کے خلاف تعزیرات ہند کی دفعہ 295اے کا استعمال کیا جانا چاہئے جو مذہبی جذبات کو مشتعل کرنے کے ارادے سے جان بوجھ کر کارروائیوں سے متعلق ہے‘‘۔محبوبہ مفتی نے کہا’’لوگوں کے مذہبی جذبات مجروح ہوئے ہیں لہٰذا اس پر ضرور کارروائی ہونی چاہئے‘‘۔انہوںنے کہا’’مذہبی جذبات میں آکر قومی نشان کی بے حرمتی کرنے والوں کے خلاف کارروائی کرنے کے بجائے حکومت کو چاہئے کہ وہ قومی نشان والی تختی نصب کرنے کے ذمہ داروں کے خلاف ایف آئی آر درج کرے جنہوں نے اس طرح کی حرکت کی اجازت دی۔ حضرت بل ایک مذہبی مقام ہے ‘‘۔
