عظمیٰ نیوزسروس
جموں// جموںوکشمیر بی جے پی کے جنرل سیکریٹری وبود گپتا نےکہاکہ مودی حکومت نے این سی، کانگریس اور پی ڈی پی کی زیرقیادت حکومتوں کی طرف سے کئی دہائیوں کی ناانصافی کے بعد بے گھر ہونے والے خاندانوں کو بے گھر/متولیوں کی جائیدادوں پر زمین کے مالکانہ حقوق دے کرانصاف فراہم کیا۔ وہ پارٹی ہیڈکوارٹر، تریکوٹہ نگر جموں میں ایک پریس کانفرنس سے خطاب کررہے تھے ۔وبود گپتا نے ایل جی منوج سنہا کے عوام پر مبنی فیصلوں کی ستائش کی۔ انہوں نے کہا کہ بی جے پی بے گھر افراد کی جانب سے وزیر اعظم نریندر مودی، مرکزی وزیر داخلہ امیت شاہ اور ایل جی منوج سنہا کا تہہ دل سے شکریہ ادا کرتی ہے۔ انہوں نے کہا کہ 1947، 65 اور 71 میں 30,000خاندانوں کی بے گھر ہونے والی آبادی، جو کہ انخلاء/ متولی جائیدادوں پر آباد ہوئی تھی، کو زمین کے مالکانہ حقوق دیے گئے ہیں۔گپتا نے کہا’’وہ 30,000بے گھر خاندان اب وقت کے ساتھ بڑھ کر 1,50,000خاندان بن چکے ہیں۔ ان سب کو اس فیصلے سے فائدہ ہوا ہے۔ اس سے قبل بھی، ایل جی نے ریاستی اراضی پر آباد ڈبلیو پی آر کو حقوق دیے تھے۔ یہ فیصلے بی جے پی کی ’سب کا ساتھ، سب کا وکاس، سب کا وشواس‘ پالیسی کی تصدیق کرتے ہیں‘‘۔گپتا نے جموں و کشمیرکو دھوکہ دینے اور اس کے لوگوں کے ساتھ ناانصافی کرنے پر این سی، کانگریس اور پی ڈی پی پر شدید حملہ کیا۔ انہوں نے جموں و کشمیر کے ہر طبقے کو ان کے حقوق سے دھوکہ دیا ہے اور انہیں بدحالی میں گھر گھر بھٹکنے پر مجبور کیا ہے۔ انہوں نے کہا کہ آج ان برادریوں کو مودی حکومت اور ایل جی انتظامیہ کے تحت حقوق ملے ہیں۔انکامزید کہناتھا’مغربی پاکستانی رفیوجی ،بے گھر، والمیکی، پہاڑی، گجربکروال، خواتین اور دیگر جیسی کمیونٹیز کو این سی ،کانگریس اور پی ڈی پی حکومتوں نے ان کے بنیادی حقوق جیسے ووٹنگ کے حقوق، تعلیم کے حقوق یا سرکاری ملازمتیں حاصل کرنے سے روکا تھا۔ والمیکی برادری اپنی تعلیم سے قطع نظر صرف صفائی کرمچاری کا کام کر سکتی ہے۔ ان جماعتوں نے بین الاضلاع بھرتیوں، سیاسی ریزرویشن، جنگل کے حقوق وغیرہ پر پابندی لگا دی، ان تمام برادریوں کو مودی حکومت کے تحت 2019 کے بعد ان کے حقوق مل گئے۔بی جے پی نے شروع سے ہی ان برادریوں کی جدوجہد کو آگے بڑھایا ہے اور یہ یقینی بنائے گی کہ ان برادریوں کو کم سے کم وقت میں حقوق مل جائیں‘‘۔انہوں نے کہا کہ بی جے پی جموں و کشمیر میں حکومت کے قیام کے بعد زیر التواء حقوق دینے اور ان کمیونٹیز کے تمام حقوق کی حفاظت کے لئے پرعزم ہے۔
