سرینگر//شیخ محمد عبداللہ کی اہلیہ بیگم اکبر جہاں کی 17ویں برسی پر جموں وکشمیر نیشنل کانفرنس کے صدر ڈاکٹر فاروق عبداللہ نے نسیم باغ میں واقع مزار پر حاضری دی اور اجتماعی فاتحہ خوانی میں شرکت کی۔ اُنہوں نے موصوفہ ، جنہیں عرف عام میں مادرِ مہربان کے نام سے جانا جاتا ہے کی مرقد پر بھی گلباری کی اور ایصال ثواب کیلئے کلمات ادا کئے۔ تقریب میں پارٹی کے جنرل سکریٹری علی محمد ساگر، معاون جنرل سکریٹری ڈاکٹر شیخ مصطفیٰ کمال، صدر صوبہ کشمیر ناصر اسلم وانی، چودھری محمد رمضان، عبدالرحیم راتھر، محمد اکبر لون، مبارک گل ،جنید عظیم متو، میر سیف اللہ، سکینہ ایتو، شمیمہ فردوس، عرفان احمد شاہ، عبدالمجید لارمی، قیصر جمشید لون، شوکت حسین گنائی، پیر آفاق احمد،محمد سعید آخون، جاوید احمد ڈار، شیخ اشفاق جبار ، سلمان علی ساگرکے علاوہ کئی لیڈران بھی شامل تھے۔ اس موقعے پر پارٹی لیڈران نے بیگم اکبر جہاں کی تاریخ ساز سیاسی، سماجی خدمات پر روشنی ڈالی اور کہا کہ مادر مہربان نے تحریک کشمیر میں، کوئٹ کشمیر کی جو اہم رول ادا کیا ہے وہ سنہری حروف سے تاریخ میں اندراج ہے۔ انہوں نے کہا کہ مرحومہ نے سماج کے پسماندہ طبقوں ، گجر ، بکروال اور پہاڑی لوگوں کی فلاح و بہبود اور انہیں تعلیم سے آراستہ کرنے میں جو کلیدی رول ادا کیا وہ ناقابل فراموش ہے۔ مادر مہربان میں سماج میں عورتوں کو بااختیار بنانے میں اہم رول دا کیا۔انہوں نے کہا کہ مرحومہ 67سال کے طویل عرصے تک کشمیری کی سیاسی، سماجی زندگی پر چھائی رہی۔ مادر مہربان نے ریاستی عوام کو خواب غفلت سے جگانے ، غلامی کے خلاف صف آرا ہوجانے، فرقہ وارانہ بھائی چارے کو تقویت دینے اور عوام خاص کر خواتین کے معیار زندگی کو بہتر بنانے میں کلیدی رول ادا کیا اور اپنے آپ کو بیسویں صدی کی سب سے ممتاز کشمیری خاتون ثابت کرنے میں کامیابی حاصل کرلی۔ دریں اثناء شیر کشمیر بھون میں بھی مادر مہربان کو خراج عقیدت پیش کرنے کیلئے تقریب کا انعقاد ہوا۔جس میں تمام سینئر لیڈرران ، ممبران قانون سازیہ ، یوتھ اور زنانہ ونگ کی قیادت بھی موجود تھی۔ مقررین نے مرحومہ کو بیسویں صدی کی ایک عظیم لیڈر اور عوامی خدمت گار قرار دیتے ہوئے کہا ،کہ مرحومہ کو بہت وقت تک یاد کیا جاتا رہیگا۔ لیہہ ، کرگل، ڈوڈہ ، کشتواڑ، پونچھ راجوری، گول، رام بن اور زنسکار کے علاوہ دیگر مقامات پر بھی تقریب کا انعقاد ہوا۔اس کے علاوہ مادرِ مربان بہبودِ خواتین و اطفال مرکز مسکین باغ میں بھی ایک تقریب کا انعقاد ہوا جس میں مادر مہربان کے اُن سماجی اور سیاسی خدمات خصوصاً پسماندہ طبقوں کے لوگوں کی ترقی کیلئے گئے کام کو اجاگر کیا گیا۔ تقریب کی صدارت سینٹر کی چیئرپرسن بیگم سریا متو نے کی۔
بیگم اکبر جہاں کی 17ویں برسی پر نسیم باغ میں تقریب
