بھارت ایران فارسی ادب میں اخلاقی عناصر

 سرینگر//کشمیر یونیورسٹی میں شعبہ فارسی کے زیر اہتمام سے 3 روزہ بین الاقوامی سمینار اختتام پذیر ہوا جس میں 120 ملکی و غیر ملکی دانشوروں ،اسکالروں اور زبان و ادب سے وابستہ شخصیات نے شرکت کرکے تحقیقی مقالے پڑھے۔ کے این این کے مطابق کشمیر یونیورسٹی کے ابن خلدون آڈٹوریم میں ’’ہند و ایران فارسی ادب میں اخلاقی عناصر‘‘ کے عنوان سے تین روزہ بین الاقوامی سمینار کا انعقاد ہوا جس کا افتتاح کشمیر یونیورسٹی کے وائس چانسلر پروفیسر خورشید اقبال اندرابی نے کیا جبکہ پروفیسر اندرابی کے علاوہ ہندوستان، افغانستان، ایران، پاکستان اور قزاکستان کے نامور اسکالروں، دانشوروں اور ادب سے وابستہ شخصیات نے شرکت کرکے تحقیقی مقالے پیش کئے۔شعبہ فارسی کے سربراہ ڈاکٹر جہانگیر اقبال تانترے نے خطبہ استقبالیہ پیش کیا جبکہ ڈاکٹر شاداب ارشد نے مہمانوں کو گلدستے اور کشمیری شال پیش کئے۔ پروفیسر شریف حسین قاسمی ،پروفیسر محمد منور مسعودی، پروفیسر عبدالخالق رشید اور پروفیسر عارف ایوبی نے بھی افتتاحی مجلس میںسمینار کی مناسبت سے اظہار خیال کیا ۔پروفیسر خورشید اقبال اندرابی ، پروفیسر محمد زمان آزردہ اور ایران کے نامور قلمکار ،ادیب و ماہر تعلیم علی رضا قزوہ نے اپنے اپنے لیکچروں میں اخلاقیات اور فارسی ادبیات کے حوالے سے مدلل لیکچر کئے۔سمینار میں شعبہ فارسی کشمیر یونیورسٹی سے شائع ہونے والے  مجلہ’’دانش‘‘کی رسم رونمائی بھی انجام دی گئی۔سمینار میں مقررین نے فارسی زبان و ادبیات کے تئیں انتظامیہ کی بے حسی پر افسوس کا اظہار کرتے ہوئے کہا کہ فارسی زبان میں ایک عظیم سرمایہ موجود ہے جو اخلاقی بحران کے خاتمے کیلئے کارگر ثابت ہوسکتا ہے۔