سرینگر//نیشنل کانفرنس کے نائب صدر عمر عبد اللہ نے سنیچر کو بھارت اور پاکستان کے مابین امن کی فضا قائم ہونے کا خیر مقدم کرتے ہوئے کہا کہ دونوں ممالک کو چاہئے کہ وہ خفیہ بات چیت کے بعد اب کھلے مذاکرات کی راہ اختیار کریں تاکہ کشمیر سمیت سبھی مسائل حل کئے جاسکیں۔
جنوبی ضلع پلوامہ میں ایک تقریب کے حاشیئے پر نامہ مگاروں سے بات کرتے ہوئے عمر نے کہا کہ اُن کی پارٹی نے ہمیشہ دوجنوب ایشیائی ممالک کے مابین دوستی کی خواہش رکھی ہے۔
انہوں نے کہا ”یہ اچھی بات ہے کہ بھارت اور پاکستان آپس میں بات کررہے ہیں، لیکن اُنہیں بہت کچھ اور کرنا ہوگا“۔
نیشنل کانفرنس کانفرنس کے نائب صدر کا کہنا تھا کہ اب بھارت اور پاکستان کو کھلے مذاکرات کی راہ اپنانی چاہئے تاکہ سبھی مسائل کا حل تلاش کیا جاسکے۔
عمر نے کہا”ہم نے خفیہ مذاکرات کے بارے میں سنا، ہماری خواہش ہے کہ اب کھلے مذاکرات ہوں تاکہ جموں کشمیر سمیت سبھی مسائل حل کئے جاسکیں“۔
پی ڈی پی صدر محبوبہ مفتی کو انفورسمنٹ دائریکٹوریٹ کے ہاتھوں پوچھ تاچھ کے بارے میں پوچھے گئے سوال کا جواب دیتے ہوئے عمر نے کہا”یہ مرکز کی پالیسیوں سے اختلاف کرنے کی قیمت ہے“۔
