یو این آئی
نئی دہلی//ہندوستان کے دورے پر آئے متحدہ عرب امارات کے پارلیمانی وفد نے جمعرات کو پارلیمنٹ ہائوس کمپلیکس میں لوک سبھا کے اسپیکر اوم برلا سے ملاقات کی۔ محکمہ دفاع، داخلہ اور خارجہ امور کی کمیٹی کے چیئرمین ڈاکٹر علی راشدنعیمی اس وفد کی قیادت کر رہے ہیں۔ہندوستان کی تاریخ اور ہندوستان اور متحدہ عرب امارات کے درمیان صدیوں پرانی تہذیبی اور ثقافتی اشتراک کا حوالہ دیتے ہوئے برلا نے کہا کہ آزادی کے بعد سے دونوں ممالک کے عوام کے درمیان رابطے میں نمایاں اضافہ ہوا ہے، جس کے نتیجے میں ہندوستانی شہریوں کی ایک بڑی تعداد متحدہ عرب امارات میں رہتی ہے اور اس کی ترقی میں اہم رول ادا کر رہی ہے۔ انہوں نے دونوں ممالک کے شہریوں اور عوام کے درمیان رابطوں ، باہمی افہام و تفہیم اور اشتراک کو مزید فروغ دینے کی ضرورت پر زور دیا۔ ہندوستان میں ٹیکنالوجی، اختراعات اور سرمایہ کاری کے مضبوط امکانات پر تبادلہ خیال کرتے ہوئے برلا نے کہا کہ اجتماعی کوششوں کی وجہ سے آج ہندوستان دنیا کی پانچویں بڑی معیشت ہے۔ سال 2022 میں اپنے یو اے ای کے دورے کا ذکر کرتے ہوئے لوک سبھا اسپیکر نے اس خیال کا اظہار کیا کہ پارلیمانوں کے درمیان باقاعدہ مذاکرات اور بات چیت دونوں ممالک کے درمیان اچھی افہام و تفہیم کا باعث بنی ہے۔ انہوں نے عالمی اور علاقائی مسائل پر دونوں ممالک کے درمیان باہمی افہام و تفہیم کو دونوں ممالک کے درمیان مضبوط تعلقات کی بنیاد قرار دیا۔ انہوں نے دونوں ممالک کے درمیان پارلیمانی وفود کے باقاعدہ تبادلوں کو دوطرفہ تعلقات کو مضبوط بنانے کیلئے ضروری قرار دیا۔ برلا نے مزید کہا کہ ہندوستان اور متحدہ عرب امارات ٹیکنالوجی کے ذریعہ اپنے ممالک کی ترقی اور خوشحالی کو یقینی بنا رہے ہیں۔
