واشنگٹن // ہندستان کی وزیر خزانہ نرملا سیتار من نے گذشتہ روز امریکی وزیر خزانہ جینیٹ ایل یلن کے ساتھ عالمی معاشی نقطہ نظر، کورونا وبا اور دیگر اہم امور پر تبادلہ خیال کیا۔
دونوں رہنماو¿ں کے مابین ٹیلیفون پر ہوئی اس گفتگو میں ہندوستان اور امریکہ کے درمیان مختلف شعبوں میں معاشی اور اسٹریٹجک تعاون بڑھانےکے لئے بھی اتفاق ہوا ہے۔ دونوں ممالک جی۔ 20 سمیت مختلف کثیرالجہتی شعبوں میں باہمی تعاون کو مستحکم کریں گے۔
امریکی وزارت خزانہ نے ایک بیان جاری کرتے ہوئے دونوں رہنماو¿ں کے مابین ہوئی بات چیت سے آگاہ کیا۔ بیان کے مطابق یلن نے ایشیاءمیں امریکہ کے ایک اہم امریکی شراکت دار کی حیثیت سے ہندوستان کے کردار کا ذکر کرتے ہوئے کہا کہ دونوں ممالک کورونا کی وبا سے متاثرہ عالمی معیشت کو بہتر بنانے ، عدم مساوات کے خلاف جنگ اور موسمیاتی تبدیلیوں کے امور پر مل کر کام کریں گے۔
امریکی وزیر خزانہ نے دونوں ممالک کی مشترکہ ترجیحات کے پیش نظر دوطرفہ اور کثیرالجہتی امور پر ہندوستان کے وزیر خزانہ سیتارمن کے ساتھ مل کر کام کرنے کا بھی عزم بھی ظاہر کیا۔
یلن نے دنیا بھر میں کورونا ویکسین کی فراہمی کے سلسلے میں ہندوستان کی کاوشوں اور تعاون کی بھی سراہنا کی۔
