عظمیٰ نیوز سروس
راجوری//بھارتیہ جنتا پارٹی کے قومی جنرل سکریٹری ترون چگ نے پارٹی کے جموں و کشمیر کے صدر رویندر رینا کے ساتھ بدھ کو راجوری میں پارٹی کیڈر میٹنگ کی صدارت کی اور لیڈروں سے کہا کہ وہ خطے میں عوامی رابطہ کو تیز کریں۔قیادت نے اننت ناگ-راجوری پارلیمانی سیٹ سے جموں و کشمیر اپنی پارٹی کی حمایت کا بھی احساس دلایا۔چگ اور رائنا ہیلی کاپٹر پر راجوری پہنچے اور راجوری کے ایڈوانس لینڈنگ گراؤنڈ میں ان کا خیرمقدم کیا گیا جہاں سے وہ بی جے پی پارٹی آفس چلے گئے جہاں پارٹی کی ضلعی کیڈر میٹنگ ہوئی جس میں ضلع بھر کے لیڈروں اور کارکنوں نے شرکت کی۔جموں و کشمیر بی جے پی کے صدر رویندر رینا نے میٹنگ سے خطاب کرتے ہوئے کہا کہ اننت ناگ راجوری پارلیمنٹ سیٹ کے تمام علاقوں میں بی جے پی کی مضبوط بنیاد ہے اور پارٹی کے تمام کارکنان دن رات انتخابی مہم میں مصروف ہیں۔انہوں نے کارکنوں سے مزید اپیل کی کہ بی جے پی نے جموں و کشمیر اپنی پارٹی کی حمایت کی ہے اور پارٹی کا پورا کیڈر اس میں کام کرے۔بی جے پی کے قومی جنرل سکریٹری ترون چگ نے کیڈر کے ساتھ بات چیت کرتے ہوئے وزیر اعظم نریندر مودی کی قیادت والی حکومت کی کامیابیوں کو درج کیا جس نے معاشرے کے ہر ایک گھر کو فائدہ پہنچایا ہے۔انہوں نے مزید کہا کہ اننت ناگ راجوری پارلیمانی سیٹ پر بی جے پی کیڈر سب سے مضبوط ہے۔
