عظمیٰ نیوز سروس
جموں //بھارتیہ جنتا پارٹی (بی جے پی) جموں و کشمیر نے اپنے سینئر لیڈروں کی قیادت میں جموں و کشمیر کے پانچ پارلیمانی حلقوں کے لئے اپنے انتخابی دفاتر کا افتتاح کیا۔رویندر رینہ، صدر جے اینڈ کے بی جے پی نے پارٹی کے دیگر سینئر لیڈروں کے ساتھ بخشی نگر، (پی آر ہوٹل کے بالمقابل) میں جموں پارلیمانی الیکشن دفتر کا افتتاح کیا۔رویندر رینہ کے ساتھ ایم پی (لوک سبھا) جوگل کشور شرما، پارلیمانی کلسٹر انچارج اور سابق نائب ناظم بھی تھے۔ رویندر رینہ نے اس موقع پر خطاب کرتے ہوئے کہا کہ بی جے پی نے جموں و کشمیر میں پانچ پارلیمانی نشستوں کے لئے اپنے 6 انتخابی دفاتر کا افتتاح کیا ہے۔ انہوں نے تنظیم کو مضبوط بنانے میں پارٹی کیڈر کی کوششوں کو سراہا۔ موصوف نے کہا کہ ادھم پور، سری نگر، بارہمولہ اور راجوری-اننت ناگ سیٹوں کے لئے پارٹی دفاتر کھول دئیے گئے ہیں۔ انہوں نے کہا کہ جلد ہی اسمبلی حلقوں میں مزید انتخابی دفاتر بھی کھولے جائیں گے۔ انہوں نے بتایا کہ آج سے آئندہ پارلیمانی انتخابات کی تمام سرگرمیاں ان دفاتر کے ذریعے مربوط کی جائیں گی۔ اس موقع پر انہوں نے چار پارلیمانی حلقوں کے لئے باقی پانچ دفاتر کا بھی ای-افتتاح کیا۔اسی طرح جموں و کشمیر بی جے پی کے جنرل سکریٹری (آر جی) اشوک کول نے ویر صراف اور دیگر قائدین کے ساتھ اننت ناگ میں پارلیمانی الیکشن دفتر کا افتتاح کیا۔مرکزی وزیر مملکت ڈاکٹر جتیندر سنگھ اور جموں و کشمیر بی جے پی کے چیف ترجمان سنیل سیٹھی اور دیگر قائدین نے ادھم پور میں پارلیمانی الیکشن دفتر کا افتتاح کیا۔ایم پی راجیہ سبھا ای آر۔ غلام علی کھٹانہ نے سابق ایم ایل سی سریندر امباردار اور دیگر رہنماؤں کے ساتھ سری نگر میں پارلیمانی الیکشن دفتر کا افتتاح کیا۔جے اینڈ کے بی جے پی کے جنرل سکریٹری سنیل شرما نے پارٹی کے سینئر لیڈر اور جموں و کشمیر وقف بورڈ کے چیئرمین ڈاکٹر درخشاں اندرابی اور دیگر رہنماؤں کے ساتھ بارہمولہ میں پارلیمانی الیکشن دفتر کا افتتاح کیا۔
پارلیمانی انتخابات میں اس بار کشمیر سے بھی کنول کا پھول کھلے گا :رویندر رینہ
عظمیٰ نیوز سروس
جموں//جموں وکشمیر بی جے پی یونٹ کے صدر رویندر رینہ نے منگل کے روز کہا کہ پارلیمانی چناو میں جیت کی خاطر پارٹی نے سبھی تیاریاں مکمل کرلی ہیں۔انہوں نے کہاکہ جموں وکشمیر میں سبھی نشستیں جیتنے کی کوشش کریں گے اور ہمیں پورا یقین ہے کہ اس بار کشمیر سے بھی کنول کا پھول کھلے گا۔اپوزیشن اتحاد کو ڈوبتا ہوا جہاز قرار دیتے ہوئے رویندر رینہ نے کہاکہ انڈیا بلاک کا کنونئرہی بھاجپا میں آگیا تو ان کے پاس اب بچا کیا ہے۔ان باتوں کا اظہار موصوف نے جموں میں نامہ نگاروں سے بات چیت کے دوران کیا۔انہوں نے کہاکہ پارلیمانی انتخابات کے حوالے سے بی جے پی جموں وکشمیر یونٹ نے تیاریاں شروع کی ہیں اور بہت جلد ناموں کو بھی حتمی شکل دی جائے گی۔انہوں نے مزید بتایا کہ جموں وکشمیر کے پانچ پارلیمانی حلقوں میں دفاتر کھولے جا رہے ہیں۔انہوں نے کہاکہ فروری مہینے میں 90 اسمبلی حلقوں میں بھی دفاتر کھولے جارہے ہیں تاکہ بھاجپا کی کی جیت کو یقینی بنایا جاسکے۔ان کے مطابق مارچ کے مہینے میں ہر بلاک میں بھاجپا کی جانب سے دفاتر کھولے جائیں گے اور اس حوالے سے جموں میں 180اور کشمیر میں زائد از سو دفاتر کھولنے کی خاطر تیاریاں ہو رہی ہیں۔رویندر رینا نے کہاکہ جموں وکشمیر میں بھاجپا کے 15لاکھ سرگرم ورکر ہیں اور انہیں چناو کے حوالے سے کام سونپا گیا ہے۔انہوں نے بتایا کہ بھاجپا جیت کے مشن کے ساتھ الیکشن میں اترے گی۔بی جے پی صدر کے مطابق جب سے جموں وکشمیر مرکز کا انتظام علاقہ بنا تب سے یہاں پر امن و امان قائم ہوا ، مودی حکومت سب کو ساتھ لے کر کام کررہی ہیں۔رویندر رینا نے بتایا کہ اس بار پارلیمانی الیکشن میں کشمیر سے بھی کنول کا پھول کھلے گا۔انڈیا بلاک دو پھاڑ ہونے کے بارے میں پوچھے گئے سوال کے جواب میں رویندر رینا نے کہاکہ اپوزیشن پارٹیاں ڈوبتے ہوئے جہاز میں سوار ہیں۔انہوں کہاکہ انڈیا بلاک کا کنونئر ہی بھاجپا میں شامل ہوا تو اب ان کے پاس بچا کیا ہے۔
