سرینگر/بھارتیہ جنتا پارٹی کے جنرل سیکریٹری رام مادھو نے سوموار کو کہا کہ اُن کی پارٹی الیکشن کمیشن آف انڈیا سے اپیل کررہی ہے کہ جموں کشمیر میں اسمبلی انتخابات اس سال کے آخر تک منعقد کرائے جائیں۔
جموں میں ایک پریس کانفرنس کے دوران رام مادھو نے حریت کانفرنس کی نقطہ چینی کرتے ہوئے کہا کہ وہ بات چیت کے بارے میں اپنی رائے دینے کی پوزیشن میں نہیں ہے۔
خبر رساں ایجنسی اے این آئی کے مطابق رام مادھو نے کہا''حریت اس پوزیشن میں بالکل نہیں ہے کہ وہ حکومت کو بات چیت کے بارے میں رائے دے سکے۔دو سال قبل حکومت نے حریت کو بات چیت کی پیشکش کی تھی اور اس کیلئے خصوصی مذاکرات کار کی تعیناتی بھی عمل میں لائی گئی تھی لیکن حریت تب تیار نہیں ہوئی ۔اب وہ بات چیت کے وقت کے بارے میں کوئی رائے نہیں دے سکتے ہیں''۔
رام مادھو نے دفعہ 370کے بارے میں پارٹی مؤقف کی وضاحت کرتے ہوئے کہا کہ مودی سرکار اُن سب پرویژنز کو ختم کرنے کیلئے وعدہ بند ہے جن کے ذریعے جموں کشمیر کو خصوصی پوزیشن حاصل ہے۔
انہوں نے کہا''جہاں تک دفعہ370کا تعلق ہے ہم فکری طور وعدہ بند ہیں کہ اس کو ختم کریں گے''۔
