سمت بھارگو
راجوری//راجوری ضلع کے بڈھال گاؤں میں مسلسل پابندیوں کا نفاذ جاری ہے، جہاں تمام سڑکیں سیل کر دی گئی ہیں اور صرف مخصوص نقل و حرکت کی اجازت دی جا رہی ہے۔پولیس اور سی آر پی ایف کے اہلکاروں کو عوامی تحفظ کے پیش نظر گاؤں میں تعینات کیا گیا ہے۔ یہ اقدامات اس پراسرار صورتحال کے بعد کئے گئے ہیں، جس میں 7 دسمبر سے اب تک 17 افراد جان کی بازی ہار چکے ہیں۔بدھ کے روز احتیاطی اقدامات کے طور پر گاؤں میں پابندیاں عائد کی گئیں اور متاثرہ افراد کے قریبی روابط رکھنے والوں کو علیحدہ مراکز میں منتقل کیا گیا ہے۔پابندیوں کے دوران، ڈاکٹروں کی متعدد ٹیمیں گاؤں کے دیگر علاقوں میں رہنے والے افراد کی اسکریننگ میں مصروف ہیں تاکہ کسی ممکنہ انفیکشن کے پھیلاؤ کو روکا جا سکے۔حکام کا کہنا ہے کہ ابتدائی تحقیقات سے ظاہر ہوتا ہے کہ اموات کی ممکنہ وجہ زہریلے مواد ہیں، نہ کہ کوئی متعدی بیماری۔گاؤں کو سیکشن 163 کے تحت جاری کردہ آرڈرز کے ذریعے تین علیحدہ زونز میں تقسیم کیا گیا ہے۔بڈڈھال گاؤں، جو کوٹرنکہ سب ڈویژن کے دشوار گزار پہاڑوں میں واقع ہے، جموں و کشمیر کے راجوری ضلع کے دور دراز علاقوں میں شامل ہے۔ یہاں ہونے والی پراسرار اموات نے مقامی آبادی میں خوف و ہراس کی لہر دوڑا دی ہے۔
