عظمیٰ نیوز سروس
سرینگر //ضلع ہسپتال بڈگام میں طبی ٹیسٹوں کی جانچ کیلئے عملے اور مشینری کی کمی کے باعث مریضوں کو شدید مشکلات درپیش ہیں۔سرکاری ہسپتال ہونے کے باوجود بھی لوگوں کونجی طبی مراکز کا رخ کرنا پڑتا ہے ۔نیوز ایجنسی سی این آئی کے مطابق ایک مریض کے تیمار دار نے بتایا کہ یہاں ٹیسٹ کرانے کا مشورہ دیا جاتا ہے لیکن ہسپتال میںعملہ ٹیسٹ کرانے کیلئے موجود نہیں ہے اوراتوار کا بہانہ بنا کر مریضوں کو نجی مراکز کا رخ کرنے کیلئے مجبور کیا جارہا ہے۔یہاں آنے والے مریضوں کا کہنا ہے کہ سرکاری ہسپتال غریبوں کی راحت رسانی کیلئے بنائے گئے ہیں لیکن جب غریبوں کو مکمل علاج نہ مل جائے تو ایسے ہسپتال کی پھر کیا ضرورت ہے ۔ ایک اورشخص نے ہسپتال میں ناقص سہولیات کے بارے میں کہا کہ اس ہسپتا ل کانہ ہونا بہتر ہی ہے ۔ انہوں نے کہا کہ ہسپتال میں اکثر و بیشتر ڈاکٹر موجود نہیں رہتے ہیں جس کے باعث مریضوں کو سرینگر کا رخ کرنا پڑتا ہے ۔ انہوں نے حکومت سے اس سلسلے میں اقدامات کی اپیل کی۔
