یو این آئی
سرینگر// سرینگر کے بٹہ مالو علاقے میں آگ کی ایک بھیانک واردات میں تین رہائشی مکانات خاکستر ہوگئے۔ ہفتے کی سہ پہر ایک رہائشی مکان سے آگ نمودار ہوئی جس نے آناً فاناً مزید دو مکانوں کولپیٹ میں لے لیا۔معلوم ہوا کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں اگر چہ آگ پر قابو پایا گیا تاہم تین رہائشی مکانوں کو نقصان پہنچا اورلاکھوں روپئے مالیت کی اشیاء راکھ کے ڈھیر میں تبدیل ہوگئیں۔فائر اینڈ ایمرجنسی محکمہ کے ایک عہدیدار نے بتایا کہ ہفتے کی سہ پہر چار بجکر 14منٹ پر بٹہ مالو میں رہائشی مکان سے آگ کے شعلے بلند ہونے کی اطلاع موصول ہوتے ہی چار بجکر 15منٹ پر فائر اینڈ ایمرجنسی عملہ جائے موقع پر پہنچا۔انہوں نے بتایا کہ گنجان آبادی ہونے کے باوجود بھی آٹھ فائر ٹینڈروں کی مدد سے آگ پر فوری طورقابو پایا گیا۔انہوں نے بتایا کہ آگ کی اس واردات میں تین رہائشی مکانات کو نقصان پہنچا ۔دریں اثناء مقامی لوگوں نے فائر اینڈ ایمرجنسی عملے کی سراہنا کرتے ہوئے بتایا کہ چند منٹوں کے اندر اندرہی فائر اینڈ ایمرجنسی محکمہ کے اہلکار جائے موقع پر پہنچے۔انہوں نے بتایا کہ چونکہ جس علاقے میں آگ نمودارہوئی وہ کافی گنجان ہے تاہم فائر اینڈ ایمرجنسی عملے نے کمال جرات کا مظاہرہ کرکے آگ پر قابو پالیا۔پولیس نے آگ لگنے کی وجوہات جاننے کی خاطرکیس درج کیا ہے۔
