ٹی ای این
سرینگر// بنگلہ دیش میں سیاسی صورتحال میں استحکام کے آثار ظاہر ہونے کے ساتھ ہی کشمیر کی پھلوں کی صنعت نے احتیاط کے ساتھ ملک کو اپنے سیب کی برآمدات کو دوبارہ شروع کر دیا ہے۔یہ پیش رفت ہفتوں کی غیر یقینی صورتحال کے بعد ہوئی ہے جب بنگلہ دیش میں بدامنی نے تجارت کو شدید متاثر کیا تھا، جس سے کشمیری میوہ کاشتکاروں اور ڈیلروں میں تشویش پائی جاتی ہے۔کشمیر میں میوہ کاشتکاروں کی تنظیم کے ایک سینئر رکن نے کہا کہ بنگلہ دیش کو سیب کی برآمدات کا دوبارہ آغاز نہ صرف ان کے لیے بلکہ ان تمام کاشتکاروں کے لیے انتہائی اہم ہے جو غیر ملکی منڈیوں کے لیے معیاری پیداوار کو یقینی بنانے کیلئے سارا سال کام کرتے ہیں۔ انہوں نے کہاکہ یہ ڈیلرز اور کاشتکاروں دونوں کے لیے انتہائی لازمی راحت ہے۔ بنگلہ دیش میں حالیہ بدامنی نے ہم سب کے درمیان غیر یقینی صورتحال پیدا کر دی ہے۔ ہمیں اس سال کوئی آرڈر موصول ہونے کا یقین نہیں تھا۔انہوں نے مزید کہا کہ سیب کی برآمدات کا دوبارہ آغاز خوش آئند پیش رفت ہے اور اس سے کاشتکاروں اور ڈیلرز میں خوشی کی لہر دوڑ گئی ہے۔کشمیر کے پھل کاشتکاروں کی نمائندگی کرنے والی اعلیٰ ترین فروٹ باڈی کے صدر بشیر احمد بشیر نے کہا کہ حالیہ دنوں میں امریکن سیب کی اقسام کی کھیپ بنگلہ دیشی منڈیوں تک پہنچنا شروع ہو گئی ہے۔انہوں نے کہا کہ برآمدی منڈی ابھی پوری طرح بحال نہیں ہوئی ہے لیکن کاشتکار میں پرامید ہیں۔ انہوںنے کہاکہ ہمیں امید ہے کہ آنے والے دنوں میں، بنگلہ دیشی خریداروں کے آرڈرز کا حجم بڑھے گا۔خاص طور پر، کشمیر میں فصل کی کٹائی کے موسم کے دوران، بنگلہ دیش سے سیب کے کئی تاجر اپنے وطن میں کشمیری سیبوں کی مانگ پورا کرنے کے لیے کشمیر میں کیمپ لگاتے ہیں۔ بنگلہ دیش کشمیر سے آنے والے سیب کی اقسام، خاص طور پر امریکن سیب کی ایک اہم منڈی ہے۔ امریکی سیب کی 70 فیصد اقسام بنگلہ دیشی منڈیوں میں برآمد کی جاتی ہیں۔یہ بات قابل ذکر ہے کہ مرکزی وزارت خزانہ کی طرف سے گزشتہ سال ستمبر میں سیب، بادام، چنے اور اخروٹ پر اضافی ڈیوٹی اٹھانے کے حکم کے بعد، کشمیر کی سیب کی صنعت کو غیر معمولی بحران کا سامنا کرنا پڑا اور اس کی آمد کی وجہ سے کم مانگ کا سامنا ہے۔ خطے کے کئی مرکزی دھارے کے سیاست دانوں نے حکومت پر زور دیا ہے کہ وہ اس فیصلے پر نظر ثانی کرے، یہ کہتے ہوئے کہ اس سے کشمیر کے کاشتکاروں پر منفی اثر پڑے گا۔جیسا کہ سیب کی آمدنی جموں وکشمیر میں جی ڈی پی کے اہم شراکت داروں میں سے ایک رہی ہے، پھلوں کے ڈیلروں نے حکومت سے اپیل کی ہے کہ وہ سیب پر برآمدی ڈیوٹی کو کم کرے، تاکہ وہ مختلف ممالک کو پھل برآمد کر سکیں۔
