عظمیٰ نیوزسروس
سرینگر// سری نگر کے ہمدانیہ کالونی بمنہ علاقے میں جمعے کے روز آگ کی ایک ہولناک واردات کے دوران تین رہائشی مکان خاکستر ہوئے ہیں۔اطلاعات کے مطابق ہمدانیہ کالونی بمنہ سیکٹر نمبر 5میں جمعہ بارہ بجکر 20منٹ پر اس وقت سنسنی کا ماحول پھیل گیا ،جب رہائشی مکان سے آگ نمودار ہوئی جس نے آناً فاناً اپنے متصل مزید دو مکانوں کو لپیٹ میں لے لیا۔معلوم ہوا ہے کہ فائراینڈ ایمرجنسی اور مقامی لوگوں کی بروقت کارروائی کے نتیجے میں گر چہ آگ پر قابو پایا گیا تاہم آتشزدگی کی اس واردات میں تین رہائشی مکان تباہ ہوئے۔فائر اینڈ ایمرجنسی کے ایک عہدیدار نے بتایا کہ جمعے کے روز بارہ بجکر 21منٹ پر ہمدانیہ کالونی بمنہ میں رہائشی مکان سے آگ نمودار ہونے کی اطلاع ملتے ہی فائر اینڈ ایمرجنسی عملے کے اہلکار جائے موقع پر پہنچے۔انہوں نے کہاکہ چھ فائر ٹینڈروں کی مدد سے آگ پر قابو پایا گیا تاہم آتشزدگی کی اس واردات میں تین رہائشی مکانوں کونقصان پہنچا ہے۔دریں اثنا پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ہے۔اس دوران نوپورہ کولگام میں جمعہ کی صبح آگ نمودار ہوئی جس کے نتیجہ میں کئی رہائشی مکانوں اور دکانوںکو نقصان پہنچا۔ کئی گھنٹوں کے بعد آگ پر قابو پایاگیا۔
