بغیر میٹر والے آٹو رکھشوں کے خلاف مہم شروع

سرینگر// شہر میں بغیرمیٹر والے آٹو رکھشوں کے خلاف مہم شروع کرتے ہوئے سٹی ٹریفک پولیس نے کل جہاں68ڈرائیوروں کے خلاف کارروائی کی وہیں 11رکھشوںکو ضبط کیا گیا ۔ٹریفک پولیس کو عوام کی طرف سے مسلسل یہ شکایت موصول ہوتی تھی کہ شہر اور اطراف و اکناف میں چلنے والے آٹو رکھشا مالکان نے کرایہ کے نام پر لوٹ مچارکھی ہے کرایہ نہ ہی میٹر کی ریڈنگ کے مطابق اور نہ ہی مقررہ شرح پر لیاجاتاہے بلکہ من مرضی کی وصولی کرکے مسافروں کو دو دو ہاتھوں سے لوٹ لیا جاتا ہے۔ٹریفک پولیس نے شہرمیں چلنے والے آٹو رکشوں میں کرایوں کے ڈیجیٹل میٹر کو لازمی قرار دیا ہے ۔ٹریفک پولیس نے کل بغیر میٹر والے آٹو رکشوں کے خلاف مہم شروع کی اور مختلف مقامات پر 68ڈرائیوروں کے خلاف کارروائی کی گئی اور 11رکشوںکو ضبط کیا گیاجو ضروری دستاویزات کے بغیر ہی سڑکوں پر چل رہے تھے ۔ٹریفک پولیس نے آٹو رکھشا مالکان کو ہدایت دی ہے کہ وہ فوری ڈیجیٹل میٹر لگوائیںاور اسی کے حساب سے مسافروں سے کرایہ وصول کریں ۔