ایک سال سے سرگرم جیش گروپ کی تلاش تھی:آئی جی پی
جموں// پاکستان میں مقیم جیش محمد تنظیم کا ایک ملی ٹینٹ جمعرات کو سیکورٹی فورسز کے ساتھ ایک تصادم میں مارا گیا، جب کہ اس کے تین ساتھی ادھم پور ضلع کے جنگلاتی علاقے بسنت گڑھ میں محصور ہیں۔جموں رینج کے انسپکٹر جنرل آف پولیس بھیم سین ٹوٹی نے کہا کہ ملی ٹینٹوں کے ساتھ صبح 8.30 بجے رابطہ قائم ہوا۔انہوں نے ایک تقریب کے موقع پر نامہ نگاروں کو بتایا کہ “وہ تعداد میں چار ہیں اور ہم پچھلے ایک سال سے(اس گروپ)کا سراغ لگا رہے ہیں”۔انہوں نے کہا کہ صبح کے وقت بسنت گڑھ کے دور افتادہ بیہالی علاقے میں فوج اور پولیس کی مشترکہ تلاشی پارٹی سے ان کا سامنا ہوا۔انہوں نے کہا کہ دھند کے باوجود سرچ آپریشن جاری ہے اور اصل تصویر موسم میں بہتری کے بعد سامنے آئے گی۔حکام کے مطابق کمک پہنچا دی گئی ہے اور خراب موسم کے باوجود بڑے پیمانے پر سرچ آپریشن جاری ہے۔عہدیداروں نے مزید کہا کہ پھنسے ہوئے ملی ٹینٹ پاکستان میں مقیم جیش کے رکن ہیں اور انہیں کورور نالہ کے قریب فوج کے پیرا کمانڈوز کی قیادت میں مشترکہ تلاشی پارٹی کے ذریعہ چھپے ہوئے پایا گیا تھا۔اس سے پہلے دن میں، جموں میں مقیم فوج کی وائٹ نائٹ کور نے ایکس پر کہا، “مخصوص انٹیلی جنس کی بنیاد پر، بسنت گڑھ کے بہالی علاقے میں ہندوستانی فوج اور جموں و کشمیر پولیس نے ایک مشترکہ آپریشن شروع کیا تھا۔ ملی ٹینٹوں سے رابطہ قائم کیا گیا ہے، آپریشن فی الحال جاری ہے۔”حکام نے کہاکہ اس کے علاوہ، مشتبہ سرگرمی کی اطلاع کے بعد بدھ کی دیر رات سیکورٹی فورسز نے ضلع سانبہ کے پورمنڈل علاقے میں تلاشی مہم چلائی۔ تاہم، کچھ نہ ملنے کے بعد آپریشن پرامن طریقے سے ختم ہو۔ ایک دفاعی ترجمان نے کہا، “ہندوستانی فوج اور جموں و کشمیر پولیس کے جاری آپریشن میں، اب تک ایک دہشت گرد کو بے اثر کر دیا گیا ہے۔ آپریشن جاری ہے۔”
