ہمارے معاشرے میں بہت سےایسے بزرگ افراد ہیں جن کے پاس آمدنی کاکوئی ذریعہ نہیںاور وہ مشکلات کا شکار ہیں۔ کئی بزرگ ایسے بھی ہیں جنہوں نے اپنی زندگی بھر محنت کی لیکن مستقبل کے لئے مالی بچت نہیںکرسکے ہیں۔بعض بزرگ جو ملازمتوں سے ریٹائر ہوچکے ہیں کو یہ مشکل پیش آتی ہے کہ وہ موجودہ نظام میں اپنی پینشن حاصل کرنے کے لئے درکار دستاویزات مکمل نہیں کر پائے ہیںاور اس وجہ سے وہ اپنی بنیادی ضروریات کی حصولیابی کے لئےپریشان رہتے ہیں۔بے شک بڑھاپے میں صحت کے مسائل بڑھ جاتے ہیں اور ان مسائل کا حل مہنگی علاج کی صورت میں ہوتا ہے جو زیادہ تر بزرگ افراد کی استطاعت سے باہر ہوتا ہے۔ سرکاری اسپتالوں میں طویل انتظار اور نجی اسپتالوں کی مہنگی فیس ان کے لئےعلاج کو مشکل بنا دیتی ہے۔اُنہیںجن مختلف بیماریوں کے لیے علاج کی ضرورت ہوتی ہے، ان میں دل کی بیماری، ذیابیطس، ہڈیوں اور جوڑوں کے مسائل شامل ہیں، جو ان کے زندگی کے معیار کو متاثر کرتے ہیں۔ بہت سے بزرگ افراد کے لیے معیاری صحت کی خدمات تک رسائی مشکل ہوتی ہے،جو دور دراز علاقوں میں رہائش پذیر ہوتے ہیں، اُن کے پاس نقل و حرکت کے لیے وسائل بھی نہیں ہوتےاوروہ بے کسی کی وجہ سے ذہنی تناؤ کا شکار ہو جاتے ہیں۔ اسی طرح کسی بزرگ کا خاندان دُور ہو یا وہ اکیلا رہتا ہو،تو اس کی صحت متاثر ہوجاتی ہےاوراُن میں ڈپریشن اور دیگر بیماریاں جنم لیتی ہیں۔خوراک، رہائش اور دیگر بنیادی ضروریات میں مشکلات کا سامنا بھی بزرگوں کے مسائل میں شامل ہے۔ بعض بزرگوں کو اپنی روزمرہ کی زندگی کے لئے مددگار کی ضرورت ہوتی ہے، کیونکہ جسمانی کمزوری کی وجہ سے وہ خود تمام کام نہیں کر سکتے۔بیشتر مالی طور پر مستحکم نہیں ہوتےجوان کی زندگی کو مزید پیچیدہ بناتے ہیں۔اس لئےحکومت کو نہ صرف پینشن اسکیموں کو موثربنانا چاہئے بلکہ ان اسکیموں کے شرائط کو آسان بنانا چاہئے تاکہ ہر بزرگ تک اس کی رسائی ہوسکے۔ ڈیجیٹل پلیٹ فارم پر سہولت فراہم کرنا بھی ضروری ہے تاکہ بزرگ افراد بغیر کسی مشکل کے اپنی پینشن اور مالی امداد حاصل کر سکیں۔ اسی طرح غیر سرکاری ادارے اور این جی اوز بھی بزرگوں کی مالی مدد کے لئے ایسے پروگرام ترتیب دیں تاکہ بزرگ افراد خود کو معاشرتی زندگی میں شامل رکھ سکیں اور اُنہیںروزمرہ کے خرچوں میں امداد حاصل ہو سکے۔ ان اسکیموں میں کھانا، دوا اور دیگر بنیادی ضروریات کی امداد شامل ہوں، ساتھ ہی بینکوں کو بھی بزرگوں کے لئے مالی سہولیات فراہم کرنی چاہئے۔خصوصاًبزرگوں کے لئے مخصوص اُن صحت خدمات کا قیام لازم ہے،جن میں سستا یا مفت علاج کی سہولت شامل ہو۔بزرگوںکے لئےاسپیشل کلینک یا اسپتال قائم ہونا چاہئے، جہاں اُن کی بیماریوں کا خصوصی علاج کیا جائے۔اُنہیں صحت کے بارے میں تعلیم بھی دی جانی چاہیے،تاکہ وہ صحت مند غذا، ورزش اور دیگر صحت کے اصولوں سے باخبر ہوکر اپنی صحت کا خیال خود رکھ سکیں۔بزرگوں کی تنہائی کو کم کرنے کے لیے مختلف سماجی سرگرمیوں کا انعقاد کرنا بھی ضروری ہے۔ اس سے نہ صرف ان کی تنہائی دور ہوگی بلکہ وہ اپنے آپ کو معاشرے کا ایک فعال حصہ محسوس کریں۔اسی طرح معاشرتی تعلیم کے ذریعے خاندانوں کوبھی یہ سمجھانا انتہائی ضروری ہے کہ وہ بزرگوں کے ساتھ وقت گزاریں اور ان کی دیکھ بھال کرکے ایک عظیم عمل کو سرانجام دیں۔اگر خاندانوں کو تعلیم دی جائے تو وہ بہتر طریقے سے بزرگوں کی مدد کر سکیں گے۔الغرض حکومت کو بزرگوں کے مسائل کو حل کرنے کے لیے جامع اور طویل مدتی اُن پالیسیوںکو ترتیب دینےکی ضرورت ہے،جن پالیسیوں کے تحت بزرگوں کے لئےعلاج، رہائش، خوراک اور دیگر ضروریات کی فراہمی شامل ہوں۔ بزرگوں کے حقوق کے تحفظ کے لئےقانون سازی بھی اہم ہے تاکہ ان کے خلاف کسی بھی قسم کی بدسلوکی یا ظلم کو روکا جا سکے۔ اگر ہم ان کے مسائل کو سمجھ کر مربوط اقدامات کریں توبزرگوں کی زندگی بہتر ہوگی بلکہ معاشرت میں بھی خوشحالی آئے گی۔ بزرگوں کا احترام اور ان کی دیکھ بھال جہاںہماری اجتماعی ذمہ داری ہے وہیں ہمارا دینی فریضہ بھی ہے۔
! بزرگوں کے مسائل، حکومت اور معاشرہ
