بریک فیل ہونے سے غیر اندراج شدہ یاترا بس حادثے کا شکار کئی یاتری بس سے کودنے کے دوران زخمی،گاڑی کھائی میں گرنے سے بچ گئی

محمد تسکین

بانہال //پنجاب کے ہوشیار پور سے تعلق رکھنے والی ایک غیر اندراج شدہ امرناتھ یاترا بس زیر نمبر کو بریک فیل ہونے کی وجہ سے جموں سرینگر قومی شاہراہ ناچلانہ کے مقام ایک حادثہ پیش آیا ہے تاہم اس حادثے میں تمام امرناتھ یاتری معجزاتی طور بچ نکلے اور کئی یاتریوں کو چلتی بس سے کودنے کے دوران چوٹیں آئی ہیں۔ زخمیوں کو نزدیکی فوج کیمپ اور ناچلانہ میڈیکل ایڈ سینٹر میں ابتدائی طبی امداد دی گئی ہے۔ حادثے پر پہنچے پولیس حکام نے بتایا کہ تمام یاتری محفوظ ہیں اور بریک فیل ہونے کے بعد ڈرائیور نے بس کو سڑک پر ہی روک دیا ہے اور بس کھائی میں گرنے سے بچ گئی اور تمام مسافر بال بال بچ نکلے ہیں۔ انہوں نے کہا کہ یہ غیر رجسٹرڈ بس شری امرناتھ یاترا سے واپس آکر ہوشیار پور پنجاب واپس جا رہی تھی اور بس میں بریک فیل ہونے کی خبر پھیلنے کے بعد افراتفری مچ گئی اور مسافروں نے بس سے کودنا شروع کر دیا اور چھ مسافر زخمی ہوگئے۔ انہوں نے کہا کہ شاہراہ پر ناچلانہ کے علاقوں میں ڈیوٹی پر تعینات فوج اور پولیس کے اہلکاروں نے کمال جرات کا مظاہرہ کرتے ہوئے بریک فیل ہوئی چلتی بس کو پتھر ڈال کر روکنے میں اہم کردار آدا کیا۔ پولیس ،فوج اور انتظامیہ کے افسران موقع پر موجود تھے اور یاتریوں کو وہاں سے محفوظ طور نکال کر اپنی منزلوں کو روانہ کر دیا گیا۔ پولیس ںے رابطے کی کاروائی کی ہے۔