یو این آئی
بارباڈوس/کریگ بریتھویٹ آج آسٹریلیا کے خلاف میدان میں اتریں گے اور ویسٹ انڈیز کے لیے 100 ٹیسٹ کھیلنے والے دسویں کھلاڑی بن جائیں گے ۔ وہ ویو رچرڈز، کلائیو لائیڈ، برائن لارا اور گورڈن گرینج جیسے عظیم کھلاڑیوں کی فہرست میں شامل ہوں گے ۔ گزشتہ چند برسوں میں، بریتھویٹ طویل فارمیٹ میں ویسٹ انڈیز کرکٹ کی ریڑھ کی ہڈی بن چکے ہیں۔ انہوں نے 99 ٹیسٹ میچوں میں 12 سنچریوں کی مدد سے 5943 رنز بنائے ہیں، جن میں سے 39 میچوں میں انہوں نے ٹیم کی قیادت کی ہے ۔ وہ کسی بھی دوسرے ویسٹ انڈیز کھلاڑی کے مقابلے سب سے زیادہ گیندوں کا سامنا کر چکے ہیں اور 2022 میں آئی سی سی مردوں کی ٹیسٹ ٹیم آف دی ایئر میں جگہ حاصل کی۔ان کا سفر 2011 میں ایک 18 سالہ نووارد کھلاڑی کے طور پر شروع ہوا، لیکن یہ یقین بہت پہلے آ چکا تھا، جب انہوں نے صرف 14 سال کی عمر میں اعتماد کے ساتھ اعلان کیا تھا کہ وہ ایک دن ویسٹ انڈیز کے لیے 100 ٹیسٹ کھیلیں گے ۔آسٹریلیا کے خلاف دوسرے ٹیسٹ سے قبل، کریگ بریتھویٹ نے کہا:”میں نے 100ٹیسٹ کھیلنے کایہ ہدف تب طے کیا تھا جب میں شاید 14سال کا تھا ۔ اب میں 18 سال بعد ویسٹ انڈیز کے لیے اپنا 100واں ٹیسٹ کھیل رہا ہوں۔ میں بہت شکر گزار ہوں، اور بس نوجوان کھلاڑیوں کے لیے ایک تحریک بننا چاہتا ہوں۔”مئی 2011 میں باسیٹرے میں پاکستان کے خلاف ان کا ڈیبیو متاثرکن نہیں تھا اور اس میچ میں 15 اور 0 کے اسکور کے ساتھ ان کے ٹیسٹ کیریئر کی شروعات ہوئی۔ انہوں نے خود تسلیم کیا کہ اعتماد حاصل کرنے میں وقت لگا، لیکن ایک بار جب یہ اعتماد قائم ہو گیا تو پیچھے مڑ کر نہیں دیکھا۔میرپور میں بنگلہ دیش کے خلاف اپنے تیسرے ٹیسٹ میں ایک شاندار نصف سنچری کے ساتھ وہ فارم میں واپس آئے ، اور پھر ہندوستان اور آسٹریلیا جیسی بڑی ٹیموں کے خلاف اپنے اگلے چار میچوں میں تین مزید نصف سنچریاں بنائیں۔انہیں اپنا پہلا ٹیسٹ سنچری بنانے میں تین سال لگے 2014 میں نیوزی لینڈ کے خلاف پورٹ آف اسپین میں ایک صبر و تحمل سے کھیلی گئی اننگز ان کے کیریئر کے لئے اہم موڑ ثابت ہوئی، جس نے ویسٹ انڈیز کی بیٹنگ لائن میں ان کی جگہ کو مستحکم کیا۔انہوں نے کہا:”نیوزی لینڈ کے خلاف میری پہلی سنچری ایک ایسا احساس تھا جسے میں واقعی الفاظ میں بیان نہیں کر سکتا۔ مجھے یقین نہیں آ رہا تھا کہ میں ٹیسٹ سنچری کے اتنے قریب پہنچ جاؤں گا، اور جب یہ حاصل ہوئی، تو یقین ہی نہیں ہوا کہ میں نے ویسٹ انڈیز کے لیے 100 رنز بنائے ہیں۔ یہ میرے لیے بہت معنی رکھتا تھا اور آگے بڑھنے میں مدد ملی۔”اپنی پہلی سنچری کے چند ہی ماہ بعد، بریتھویٹ نے کنگسٹاؤن میں شاندار 212 رنز کی اننگز کھیلی، جو ان کی پہلی ڈبل سنچری تھی۔ انہوں نے 2014 میں جنوبی افریقہ میں باکسنگ ڈے پر ایک اور شاندار سنچری اسکور کی اور 77.88 کی اوسط سے 701 رنز کے ساتھ سال کا اختتام کیا، جو کسی کیلنڈر سال میں ان کا دوسرا بہترین اسکور تھا۔انہوں نے کہا:”چاہے کچھ بھی ہو، کم عمری سے ہی آپ اپنے لیے کچھ اہداف مقرر کر سکتے ہیں، جنہیں آپ زندگی میں حاصل کرنا چاہتے ہیں۔ مشکل وقت ہو یا اچھا، محنت جاری رکھیں، نظم و ضبط اپنائیں، اور کبھی بھی کسی چیز کو معمولی نہ سمجھیں۔”
