عظمیٰ نیوز سروس
جموں// جموں و کشمیر حکومت نے سرینگر میونسپل کارپوریشن کے ڈپٹی میئر پرویز قادری کے خلاف بدعنوانی کے الزامات کی تحقیقات کا حکم دیا ہے۔ہائوسنگ اینڈ اربن ڈیولپمنٹ ڈیپارٹمنٹ کے ایک حکم میں حکومت نے کہا کہ انکوائری اینٹی کرپشن بیورو، سرینگر سے موصول ہونے والی رپورٹ کی بنیاد پر شروع کی گئی ہے۔جموں و کشمیر میونسپل کارپوریشن ایکٹ 2000 کے سیکشن 34 کے مطابق، انیل کول ،سیکرٹری ہائوسنگ اینڈ اربن ڈیولپمنٹ ڈیپارٹمنٹ کی بطور انکوائری آفیسر تقرری کی منظوری دی گئی ہے تاکہ تفصیلی انکوائری کی جا سکے۔ پرویز قادری، ڈپٹی میئر، کے خلاف بدعنوانی کے الزامات ہیں جن کے بارے میں اینٹی کرپشن بیورو، نے معلومات/رپورٹ فراہم کی ہے۔اس نے کہا کہ تحقیقات کے عمل کے دوران انصاف کے اصولوں کی پابندی کی جائے گی۔
