بجلی کٹوتی شیڈول پر عملدرآمد نہیں ہوتا

یہ بات روزِ روشن کی طرح عیاں ہے کہ موجودہ جدید دور میں بجلی انسانی زندگی کا ایک اہم حصہ بن چکی ہے ،جس سے اب کسی بھی انسان کو چھٹکارا نہیں ہے۔روز مرہ زندگی میں صبح سے شام تک جتنی بھی چیزیں عام طور استعمال میں آتی ہیں،تقریباً ساری چیزیں بجلیوں ہی سے چلتی ہیں۔اسی لئے اگر ترقی پذیر ملکوں میں پانچ دس منٹ کے لئے بجلی چلی جاتی ہے تو ہاہا کار مچ جاتی ہے اور اگر کچھ گھنٹوں کے لئے بجلی چلی جائے تو قیامت ِصغریٰ قائم ہوجاتی ہے ،زندگی تھم سی جاتی ہے،سانسیں رُکنے لگتی ہیں اور دم گھٹنے لگتا ہے۔اب اگر ترقی پذیر ملکوں پر نظر ڈالی جائے تو ان میں بھی اب بجلی ہی انسانی زندگی کے لئے ہر موڑ پر مسرتوں کا سامان فراہم کرتی ہے، بجلی کی عدم موجودگی میں زندگی مُرجھا جاتی ہےاور نظامِ زندگی کاتقریباً ہر شعبہ متاثر ہوجاتا ہے ،جس کا براہِ راست اثر عام لوگوں پر پڑتا ہے۔اب اگر جموں و کشمیر خصوصاً وادیٔ کشمیر کی بات کریں تو جہاں گرمیوں میںعموماً بجلی کی صورت حال ناپائیدار رہتی ہےتو وہیں سردیوں میںخصوصاًبجلی کی موجودگی کا مسئلہ پیچیدہ بن جاتا ہے۔رواں سال کے دوران بھی بجلی کی عدم موجودگی کے خلاف جب جب عوامی ردِعمل سامنے آتا رہا تو موجودہ سرکاری انتظامیہ نے بھی وہیں روایتی باتیں سُنانا شروع کردیں جو یہاں کی سرکاریںپچھلی نصف صدی سے لوگوں کو سُناتی چلی آرہی تھیں۔بالآخر جب بجلی کی کمیابی ،اس کی پیداوار میں کمی ،اس کی چوری ،فیس کی وصولیابی ،شمالی گرڈ کے قرضے اور مزید بجلی خریداری کے متعلق سرکاری رپورٹیں ، تفاصیل، دلیلیں اور وضاحتیں عوام کے سامنے لائی گئیں تو مجبوراً وادیٔ کشمیر کے صارفین بجلی کی طوطی بند ہوگئی۔پھرسرکاری انتظامیہ کی طرف سے ببانگ دُہل اعلان کیا گیا کہ اب شدید سردیوں کے اس موسم میں صارفین ِ بجلی کو شیڈول کے مطابق بجلی فراہم ہوگی اورمیٹر شدہ اور غیر میٹر شدہ علاقوں کے لئے نافذ مقررہ سپلائی شیڈول پر سختی کے ساتھ عملدرآمد ہوگا۔مرتا کیا نہ کرتا کے مصداق صارفین ِبجلی نے سرکاری اعلانات پر اکتفا کرکے مقررہ شیڈول کے تحت اپنے روز مرہ زندگی کے ضروری کام کاج نمٹانےکا طریقہ اپنا لیا ،تاکہ انہیں بجلی کی عدم دستیابی کے پیشِ نظر درپیش مسائل و مشکلات میں مزید اضافہ نہ ہوجائے۔لیکن قریباً ڈیڑھ مہینہ گذرنے کو آرہا ہے کہ شہر اور دیہات کے مختلف علاقوں سےصارفین بجلی بدستور یہ شکایت کررہے ہیں کہ انہیں مقررہ شیڈول کے مطابق بجلی نہیں مل رہی ہےاور مقررہ شیڈول کے دوران بھی آنکھ مچولی دیکھنی پڑتی ہے۔خصوصاً جن علاقوں میں میٹر نصب نہیں ہوئے ہیں ،وہاں کے صارفین بجلی کے ساتھ روایتی طریقہ اپنایا جارہا ہے۔مقررہ شیڈول کے تحت جب تین گھنٹے تک بجلی سپلائی جاری رکھنی ہوتی ہے تو محض ڈھائی گھنٹے تک رکھی جاتی ہے اور جب شیڈول کے مطابق دو گھنٹے تک بجلی سپلائی بند رکھنی ہوتی ہے تو ڈھائی گھنٹے تک بجلی بند رکھی جاتی ہے، یہ سلسلہ ہر بریک ڈاون وقفہ کے دوران جاری رکھا جارہا ہےاور اس طرح صارفین بجلی کے ساتھ بددیانتی اور نا انصافی کا بھرپور مظاہرہ کیا جارہا ہے۔ حالانکہ مقررہ فیس سختی کے ساتھ وصول کیا جارہا ہے لیکن بجلی سپلائی شیڈول کے تحت فراہم کرنے میں نافذپابندی پر عملدرآمد نہیں ہورہا ہے۔جس سےیہی محسوس ہورہا ہے کہ جموں و کشمیر کی موجودہ انتظامیہ میں کام کرنے والے بعض اعلیٰ افسر اوراہلکار کوئی ایسی کوشش بھی نہیں کرنا چاہتے ہیں،جس سے صارفین بجلی کومقررہ شیڈول کے تحت بجلی مہیا ہوسکے۔شاید وہ نہ اپنے سسٹم میں کوئی واضح تبدیلی لاتے ہیںاور نہ ہی نظام کو درست کرناچاہتے ہیں، بَس اپنی ناقص روایتی حکمتِ عملی اور بوسیدہ پالیسیوں کے تحت کام چلاکر اپنی تنخواہیں ڈھکاررہے ہیں۔جس کے نتیجے میں صورت حال ویسی ہی رہ جاتی ہے جو یہاں عرصۂ دراز سے چلی آرہی ہے۔حالانکہ عصرِ حاضر میں بجلی کتنی اہمیت کی حامل ہے،اس سے کوئی فردِ بشر ناواقف نہیں۔زندگی کا تقریباً سارا نظام بجلی پر ہی منحصر ہے۔اگرچہ وادی بھر میں بجلی کے ناجائز استعمال پر قدغن لگ چکی ہے ۔صارفین بجلی ،پہلے سے بہت زیادہ فیس بھی ادا کررہے ہیں،شہروں،قصبوں اور دیہات کے بیشتر علاقوں میں میٹر بھی نصب کئے جاچکے ہیں، کٹوتی شیڈول بھی مرتب کئے گئے ہیں،پھر بھی بجلی سپلائی مقررہ شیڈول کے مطابق جاری نہیں رہتی ہےجوکہ ایک حیران کُن بات ہے۔ضرورت اس بات کی جموں وکشمیر کی انتظامیہ کو بجلی کی فراہمی کے مسئلے پر سنجیدگی کا مظاہرہ کرےاور صدق دلی کے ساتھ صارفین بجلی کو شیڈول کے مطابق مہیا رکھنے کی ہر ممکن کوشش کرے،تاکہ صارفین بجلی کو راحت نصیب ہوسکے ۔