سرینگر/پولیس نے جمعرات کو کہا کہ فورسز نے جنوبی کشمیر کے بجبہارہ علاقے میں ایک معرکہ آرائی کے دوران جن دو جنگجوئوں کو جاں بحق کردیا اُن کی شناخت ہوگئی ہے۔
پولیس کے مطابق جاں بحق جنگجوئوں میں25سالہ صفدر امین بٹ ولد محمد امین بٹ ساکنہ زرپورہ، بجبہارہ اور25سالہ برہان احمد گنائی عرف سیف اللہ ولد غلام محمد گنائی ساکنہ ہابلش ،کولگام، حال ایس کے کالونی اننت ناگ شامل ہیں۔ برہان جب2018میں عسکریت میں شامل ہوا تو وہ فزیو تھرپی میں ڈپلوما کررہا تھا۔پولیس کے مطابق دونوں کا تعلق حزب المجاہدین کے ساتھ تھا۔پولیس نے کہا کہ معرکہ آرائی کی جگہ سے ایک اے کے47رائفل اور ایک ایس ایل آر بندوق بر آمد کی گئی ہے۔
اس سے قبل آج صبح پولیس کے مطابق بجبہارہ کے باگندر محلہ میں معرکہ آرائی پیش آئی جہاں فورسز نے محاصرے کے بعد تلاشی آپریشن شروع کیا تھا۔
پولیس نے کہا کہ تلاشی آپریشن کے دوران چھپے جنگجوئوں نے فورسز پارٹی پر گولیاں چلائیں جس کے جواب میں فورسز نے بھی گولیاں چلائیں اور یوں طرفین کے مابین معرکہ شروع ہوا۔ جنگجوئوں کی طرف سے گولیاں چلنا بند ہونے کے بعد جب وہاں تلاشی لی گئی تو فورسز کو دو جنگجوئوں کی لاشیں بر آمد ہوئیں ۔
