عازم جان
بانڈی پورہ//شمالی ضلع بانڈی پورہ میں منگل اور بدھ کی درمیانی شب سیکورٹی فورسز نے ملی ٹینٹوںکے تین مشتبہ معاونین کو گرفتار کر کے ان کے قبضے سے اسلحہ و گولہ بارود برآمد کرنے کا دعویٰ کیا ہے۔پولیس کے مطابق، سی آر پی ایف کی3 بٹالین، 13 آر آراور جموں و کشمیر پولیس نے تھانہ آراگام کے دائرہ اختیار میں آنے والے گاروڑہ چوراہے پر ایک مشترکہ ناکہ قائم کیا تھا۔ اس دوران چٹے بانڈے کی طرف سے آنے والے تین افراد نے ناکہ پارٹی کو دیکھ کر فرار ہونے کی کوشش کی۔سیکورٹی فورسز نے فوری کارروائی کرتے ہوئے تینوں مشتبہ افراد کو پکڑ لیا۔ گرفتار افراد کی شناخت طارق احمد ڈار، بلال احمد ڈار اور مدثر احمد لون کے طور پر ہوئی ہے، جو ضلع بانڈی پورہ کے شاہ گنڈ حاجن کے رہائشی ہیں۔تلاشی کے دوران ان کے قبضے سے ایک ہینڈ گرینیڈ اور دو اے کے سیریز میگزین، جن میں دس دس زندہ گولیاں موجود تھیں، برآمد کی گئیں۔ پولیس سٹیشن آراگام میں یو اے پی اے کے تحت ایف آئی آر نمبر 39/2025 کے تحت مقدمہ درج کیا گیا ہے۔تینوں گرفتار شدگان کو مزید پوچھ گچھ اور تفتیش کے لیے جوائنٹ انٹروگیشن سینٹر (جے آئی سی)بانڈی پورہ منتقل کر دیا گیا ہے۔
