عازم جان
بانڈی پورہ // بانڈی پورہ کے ضلع صدر مقام بازار سے گزرنے والی دو اہم قدیم سینچائی کوہل گاڈر کوہل اور جیندر کوہل ناجائز تجاوزات اور کوڑا کرکٹ ڈالنے سے ناپید ہورہی ہیں۔ ان دو کوہلوں کی سکڑنے سے قصبہ بانڈی پورہ اور ملحقہ علاقوں کے رہائشی اور کسان یوٹی سرکار لیفٹیننٹ گورنر اور ضلع انتظامیہ بانڈی پورہ سے مطالبہ کرتے ہیں کہ ان کی طرف توجہ مبذول کرکے سرکاری ریکارڈ کے تحت پرانی ہیت بحال کروائیں۔ گاڈر کوہل جس کا منبع سنر ونی فوجی کیمپ سے اوپر مقام پر نالہ مدھومتی ہے ،سنرونی ،آجر ،کھار پورہ، نوپورہ سے گزر کر بانڈی پورہ بازار سے گزر کر ولر جھیل میں پہنچ جاتی ہے ،جگہ جگہ پر ناجائز تجاوزات سے سکڑی ہوئی ہے ۔نوپورہ کے مقام پر ہاشمی مسجد کے مقام پر ایک شاخ گارڈ کوہل کی گردوارہ مارکیٹ سے گزرتی ہے، ناجائز تجاوزات اور کوڈا کرکٹ سے بالکل غائب دکھائی دے رہی ہے ۔ادھر ارن سملر کے مقام پر نالہ پاپچھن سے نکلنے والی جندرکوہل، ارن کنن ماڈر کے بعد نبر پورہ بانڈی پورہ میں ناجائز تجاوزات کی بھینٹ چڑھ گئی ہے اور اس کی ہیت مسخ ہوگئی ہے۔ اگرچہ جندرکوہل اور گاڈر کوہل کی خستہ حالی اور ناجائز تجاوزات کے متعلق ضلع انتظامیہ اور محکمہ جل شکتی کے اعلی افسران کو وقفے وقفے سے آگاہ کیا گیا، لیکن کاغذی احکامات تو صادر ہوئے ہیں لیکن عملی طور پر ازالہ نہیں کیا گیا ہے۔
