سرینگر//معروف بالی ووڈ اداکار رشی کپور کا جمعرات کو انتقال ہو گیا۔ وہ 67 سال کے تھے۔ ان کے انتقال کی خبر شہرت یافتہ اداکار امیتابھ بچن نے ٹویٹ کر کے دی۔ امریکہ میں کینسر کا علاج کرانے کے بعد پچھلے سال ستمبر میں ہندوستان لوٹے رشی کپور کی صحت خراب ہونے کے پیش نظر بدھ کی رات کو انہیں ایک اسپتال میں بھرتی کرایا گیا تھا۔
بدھ کے روز اداکار عرفان خان اس دنیا سے رخصت ہوئے اور اس کے ایک دن بعد جمعرات کو مشہور اداکار رشی کپور نے بھی کینسر کے عارضہ کے سبب ممبئی کے ایک اسپتال میں دم توڑ دیا۔ وہ پچھلے کچھ دنوں سے طبیعت خراب ہونے کی وجہ سے ممبئی کے ایچ این ریلائنس اسپتال میں بھرتی تھے۔ یہاں ان کی اہلیہ نیتو ان کے ساتھ تھیں۔
سال 2018 میں رشی کپور میں کینسرکی تصدیق ہوئی تھی، جس کے بعد نیویارک میں تقریباً 8 ماہ تک ان کا علاج چلا تھا۔ پہلے تو نہ ہی رشی کپور اور نہ ہی ان کی فیملی نے اس بیماری کا انکشاف کیا تھا، لیکن بعد میں خود رشی کپور نے لوگوں کو اس بات کی اطلاع دی تھی کہ انہیں کینسر ہے۔
